لیہ (نمائندہ لیہ ٹی وی) ڈپٹی کمشنر لیہ آصف علی ڈوگر نے علی الصبح شہر کا اچانک دورہ کرتے ہوئے مختلف ترقیاتی، بیوٹیفکیشن اور صفائی ستھرائی کے منصوبوں کا تفصیلی جائزہ لیا۔ اس موقع پر چیف آفیسر انفراسٹرکچر ساجد گشکوری بھی ان کے ہمراہ تھے۔ڈپٹی کمشنر نے اسلم موڑ، چوبارہ روڈ اور دیگر اہم شاہراہوں کا معائنہ کیا اور صفائی ستھرائی کے معیار، جاری بیوٹیفکیشن منصوبوں اور شہری سہولیات کی فراہمی کے حوالے سے پیش رفت کا جائزہ لیا۔ انہوں نے شہر کی خوبصورتی میں اضافے کے لیے کیے جانے والے اقدامات کا مشاہدہ کیا اور متعلقہ افسران کو منصوبوں کی بروقت تکمیل یقینی بنانے کی ہدایت کی۔دورے کے دوران ڈپٹی کمشنر آصف علی ڈوگر نے ایک سکول کی دیوار پر تخلیق کیے گئے ثقافتی فن پاروں کو سراہتے ہوئے کہا کہ ایسے اقدامات مقامی ثقافت کے فروغ اور شہری ماحول کو خوبصورت بنانے میں اہم کردار ادا کرتے ہیں۔انہوں نے جنرل بس اسٹینڈ میں جاری تعمیر و ترقی کے کاموں کا بھی جائزہ لیا جبکہ منظور پارک میں زیر تعمیر سپورٹس ارینا کا معائنہ کرتے ہوئے تعمیراتی کام کے معیار اور رفتار کو مزید بہتر بنانے کی ہدایت کی۔اس موقع پر ڈپٹی کمشنر آصف علی ڈوگر نے کہا کہ شہری سہولیات کی فراہمی میں کسی قسم کی غفلت برداشت نہیں کی جائے گی اور صفائی کے معیار کو ہر صورت برقرار رکھا جائے۔ انہوں نے واضح کیا کہ بیوٹیفکیشن منصوبے مقررہ مدت میں مکمل کیے جائیں اور ترقیاتی منصوبوں میں شفافیت اور معیار پر کوئی سمجھوتہ نہیں ہوگا۔انہوں نے متعلقہ محکموں کو ہدایت کی کہ تمام تعمیراتی منصوبوں کی مسلسل نگرانی یقینی بنائی جائے تاکہ عوام کو صاف، خوبصورت اور جدید سہولیات سے آراستہ شہر فراہم کیا جا سکے۔
