اسپورٹس ڈیسک: فیفا ورلڈ کپ 2026 کے دوران سعودی عرب کے قومی پرچم کو دیگر ممالک کے جھنڈوں کی طرح میدان میں بچھانے کے بجائے خصوصی طور پر بلند مقام پر آویزاں کیا گیا، جس نے دنیا بھر کے شائقین اور مبصرین کی توجہ حاصل کر لی۔
فیفا کے روایتی پری میچ پروٹوکول کے تحت شریک ممالک کے قومی پرچم میدان میں پھیلائے جاتے ہیں، تاہم سعودی عرب کے پرچم کے ساتھ مختلف طرزِ عمل اختیار کیا گیا۔
اس کی بنیادی وجہ سعودی قومی پرچم پر درج کلمۂ طیبہ ہے، جو اسلام کے بنیادی عقیدے کی نمائندگی کرتا ہے۔ سعودی قوانین اور مذہبی روایات کے مطابق قومی پرچم کو زمین پر رکھنا، اس پر چلنا یا کسی ایسے انداز میں استعمال کرنا جس سے بے حرمتی کا تاثر پیدا ہو، نامناسب سمجھا جاتا ہے۔
اسی حساسیت اور مذہبی تقدس کو مدنظر رکھتے ہوئے ٹورنامنٹ انتظامیہ نے سعودی پرچم کو زمین پر بچھانے کے بجائے ایک مخصوص اور بلند مقام پر نصب کیا تاکہ اس کے احترام اور وقار کو برقرار رکھا جا سکے۔
اس اقدام کو دنیا بھر میں سعودی عرب کے قومی اور مذہبی تشخص کے احترام کی ایک مثال قرار دیا جا رہا ہے۔
