لاہور (نمائندہ لیہ ٹی وی) حکومتِ پنجاب نے گرمیوں کی تعطیلات کے دوران طلبہ کی تعلیمی سرگرمیوں کو جاری رکھنے کیلئے “تعلیم پروگرام” (TALEEM Program) کے تحت صوبے کے 12 اضلاع میں سمر لرننگ کیمپس قائم کرنے کی منظوری دے دی ہے، جن میں ضلع لَیّہ بھی شامل ہے۔محکمہ تعلیم پنجاب کے مطابق سمر کیمپس کا آغاز 2 جون 2026 سے ہوگا جو 7 اگست 2026 تک جاری رہیں گے۔ یہ کیمپس ہفتے میں پانچ دن صبح 7 بجے سے 9:30 بجے تک منعقد کیے جائیں گے۔حکام کے مطابق یہ اقدام خاص طور پر ان اضلاع کے طلبہ کیلئے خوش آئند ہے جہاں تعلیمی سہولیات محدود ہیں۔ سمر لرننگ کیمپس میں بچوں کو بنیادی مضامین، تخلیقی سرگرمیوں اور سیکھنے کے جدید طریقوں کے ذریعے تعلیمی میدان میں مزید مضبوط بنانے پر توجہ دی جائے گی۔سمر کیمپس جن اضلاع میں قائم کیے جا رہے ہیں ان میں بہاولنگر، بہاولپور، بھکر، چنیوٹ، ڈیرہ غازی خان، لَیّہ، لودھراں، میانوالی، مظفر گڑھ، پاکپتن، رحیم یار خان اور راجن پور شامل ہیں۔تعلیمی ماہرین نے حکومت پنجاب کے اس اقدام کو سراہتے ہوئے کہا ہے کہ سمر کیمپس بچوں کی تعلیمی استعداد بڑھانے، سیکھنے کے تسلسل کو برقرار رکھنے اور گرمیوں کی تعطیلات کو مثبت انداز میں استعمال کرنے میں اہم کردار ادا کریں گے۔لَیّہ کے والدین اور اساتذہ نے بھی اس پروگرام پر خوشی کا اظہار کرتے ہوئے امید ظاہر کی ہے کہ اس سے ضلع کے طلبہ کو معیاری تعلیمی ماحول میسر آئے گا اور ان کی صلاحیتوں کو مزید نکھارنے میں مدد ملے گی۔
#لَیّہ #TALEEMProgram #سمر_کیمپ #PunjabEducation #SummerLearningCamps #تعلیم_پروگرام #PunjabSchools #LayyahNews #EducationNews #پنجاب #طلبہ #تعلیم #لَیّہ_ٹی_وی
