لاہور(نمائندہ لیہ ٹی وی ) چیف جسٹس Chief Justice of Lahore High Court کی منظوری کے بعد پنجاب بھر میں بڑے پیمانے پر عدالتی تقرر و تبادلوں کا فیصلہ کرتے ہوئے 266 ایڈیشنل ڈسٹرکٹ اینڈ سیشن ججز کے تبادلوں کا باضابطہ نوٹیفکیشن جاری کر دیا گیا۔ رجسٹرار Lahore High Court کی جانب سے جاری نوٹیفکیشن کے مطابق تمام ججز کو ہدایت کی گئی ہے کہ وہ 19 مئی تک اپنے نئے تعیناتی اسٹیشنز پر چارج سنبھال لیں۔ذرائع کے مطابق تبادلوں کا مقصد صوبہ بھر میں عدالتی نظام کو مزید فعال، متوازن اور مؤثر بنانا ہے تاکہ مقدمات کی بروقت سماعت اور انصاف کی فراہمی کے عمل کو بہتر بنایا جا سکے۔ تبادلوں کے اس مرحلے میں لاہور، فیصل آباد، ملتان، راولپنڈی، گوجرانوالہ، قصور، بہاولپور، اوکاڑہ، رحیم یار خان، سیالکوٹ، سرگودھا، لیہ، ڈی جی خان اور دیگر اضلاع میں ججز کو نئی ذمہ داریاں سونپی گئی ہیں۔نوٹیفکیشن کے مطابق ایڈیشنل ڈسٹرکٹ اینڈ سیشن جج مس فرخندہ ارشد کا تبادلہ اٹک سے قصور، مس شازیہ ظفر راجہ کا بہاولپور سے چشتیاں، مس مدثر حسین اور مس کنیز فائزہ بھٹی کا فیصل آباد سے لاہور جبکہ مس نادیہ صدیق اسد کا تبادلہ فیصل آباد سے ملتان کر دیا گیا ہے۔ اسی طرح مس عائشہ رشید اعوان کو گوجرانوالہ سے لاہور، مس ثمینہ حیات کو لاہور سے ننکانہ صاحب اور مس صائمہ قریشی کو سرگودھا سے لاہور تعینات کیا گیا ہے۔دیگر اہم تبادلوں میں خرم شہزاد کا لاہور سے لیہ، حماد احمد قریشی کا لیہ سے لاہور، محمد الیاس ریحان کا لاہور سے ملتان، غلام مصطفیٰ اور محمد سہیل انجم کا چشتیاں سے لاہور جبکہ شہباز احمد کا فورٹ عباس سے فیصل آباد تبادلہ شامل ہے۔ اسی طرح متعدد ججز کو راولپنڈی، فیصل آباد، ملتان، گوجرانوالہ، شیخوپورہ، بہاولنگر، پاکپتن، اوکاڑہ، جھنگ، خانیوال اور رحیم یار خان سمیت مختلف اضلاع میں تعینات کیا گیا ہے۔عدالتی حلقوں کے مطابق یہ تبادلے انتظامی ضروریات، کارکردگی اور عدالتی امور میں بہتری کو مدنظر رکھتے ہوئے کیے گئے ہیں۔ قانونی ماہرین کا کہنا ہے کہ اس اقدام سے مختلف اضلاع میں زیر التواء مقدمات کے بوجھ کو متوازن کرنے اور عدالتی نظام کی کارکردگی بہتر بنانے میں مدد ملے گی۔
