بھٹی نگر کروڑ روڈ پر کار اور موٹر سائیکل میں تصادم، ایک شخص شدید زخمی حالت میں ملتان ریفر

لیہ (نمائندہ لیہ ٹی وی ) بھٹی نگر کروڑ روڈ پر کار اور موٹر سائیکل کے درمیان خوفناک ٹریفک حادثے کے نتیجے میں ایک ہی خاندان کے تین افراد جاں بحق جبکہ ایک شخص شدید زخمی ہو گیا۔ ریسکیو 1122 کے مطابق حادثے کی اطلاع ملتے ہی کنٹرول روم سے فوری طور پر ایمبولینس روانہ کی گئی اور امدادی ٹیم چند منٹوں میں موقع پر پہنچ گئی۔ریسکیو ذرائع کے مطابق حادثہ اس وقت پیش آیا جب تیز رفتار کار اور موٹر سائیکل کے درمیان تصادم ہو گیا جس کے نتیجے میں موٹر سائیکل پر سوار افراد شدید زخمی ہو گئے۔ حادثے میں چھ سالہ بچہ ایم۔ فرقان ولد محمد عمران، رشیدہ زوجہ محمد عمران (28 سال) اور صابرہ بی بی زوجہ محمد اختر (50 سال) موقع پر ہی دم توڑ گئے۔حادثے میں محمد مزمل ولد محمد اختر (30 سال) شدید زخمی ہو گیا جسے سر پر گہری چوٹیں آئیں۔ ریسکیو 1122 کی ٹیم نے موقع پر پہنچ کر زخمی کو فوری ابتدائی طبی امداد فراہم کی، خون بہنا کنٹرول کیا اور تشویشناک حالت کے باعث مزید علاج کے لیے نشتر ہسپتال ملتان منتقل کر دیا۔ریسکیو اہلکاروں نے ضروری کارروائی کے بعد جاں بحق افراد کی لاشیں ورثاء کے حوالے کر دیں، واقعہ کے بعد علاقے میں فضا سوگوار ہو گئی اور اہل علاقہ کی بڑی تعداد جائے حادثہ اور ہسپتال پہنچ گئی۔شہریوں نے ضلعی انتظامیہ اور ٹریفک حکام سے مطالبہ کیا ہے کہ تیز رفتاری اور ٹریفک قوانین کی خلاف ورزی کے خلاف سخت اقدامات کیے جائیں تاکہ اس طرح کے افسوسناک حادثات سے بچا جا سکے۔