اسپورٹس ڈیسک: فیفا ورلڈ کپ 2026 میں عراق کی نمائندگی کرنے والے پاکستانی نژاد فٹبالر Zidane Iqbal اپنی پاکستانی شناخت کو بھی نمایاں انداز میں دنیا کے سامنے پیش کریں گے۔
عراق اور ناروے کے درمیان ورلڈ کپ میچ میں میدان میں اترتے ہی زیدان اقبال فیفا ورلڈ کپ کھیلنے والے پہلے پاکستانی نژاد فٹبالر بننے کا اعزاز حاصل کر سکتے ہیں۔
زیدان اقبال کے والد کا تعلق پاکستان جبکہ والدہ کا تعلق عراق سے ہے۔ ان کی پیدائش برطانیہ کے شہر مانچسٹر میں ہوئی، تاہم وہ بین الاقوامی سطح پر Iraq کی نمائندگی کر رہے ہیں۔
ورلڈ کپ کے دوران زیدان اقبال کے فٹبال بوٹس پر پاکستان اور عراق دونوں کے پرچم نمایاں ہوں گے۔ ان کے دائیں بوٹ پر پاکستان جبکہ بائیں بوٹ پر عراق کا جھنڈا آویزاں ہوگا، جو ان کی دوہری ثقافتی اور خاندانی شناخت کی عکاسی کرتا ہے۔
ایک انٹرویو میں زیدان اقبال نے کہا کہ وہ دونوں شناختوں کو برابر اہمیت دیتے ہیں۔ ان کے مطابق ان کے والد پاکستانی ہیں اور ان کی زندگی کے سب سے قابل احترام افراد میں شامل ہیں جنہوں نے ان کے فٹبال کیریئر میں بھرپور معاونت کی۔
انہوں نے کہا کہ وہ اپنے جوتوں پر دونوں ممالک کے پرچم فخر کے ساتھ پہنتے ہیں کیونکہ پاکستان اور عراق دونوں ان کے لیے یکساں اہمیت رکھتے ہیں۔ زیدان اقبال نے امید ظاہر کی کہ ان کی کامیابی پاکستانی نوجوانوں اور فٹبال سے وابستہ بچوں کے لیے ایک نئی امید اور تحریک ثابت ہوگی۔
