لیہ(نمائندہ لیہ ٹی وی)ضلع لیہ کی تاریخ کی پہلی فوڈ اسٹریٹ قائم کر دی گئی۔ڈپٹی کمشنر آصف علی ڈوگر نے ڈسٹرکٹ پولیس آفیسر حسن جاوید بھٹی کے ہمراہ فوڈ سٹریٹ کا باقاعدہ افتتاح کیا۔اس موقع پر ایڈیشنل ڈپٹی کمشنر جنرل شبیر احمد ڈوگر،اسسٹنٹ کمشنرز رانا زوہیب کریم،اصغر علی چیمہ،ایس ڈی ای او پیرا ام حبیبہ قریشی،اسسٹنٹ ڈائریکٹر پلاننگ اسحاق کھیرانی،سی ای او صحت ڈاکٹر شاہد ریاض،چیئرمین انجمن تاجران حاجی تنویر احمد،صدر ڈسٹرکٹ پریس کلب محسن عدیل،میڈیا نمائندگان ودیگر موجود تھے۔ڈپٹی کمشنر آصف علی ڈوگر نے اس موقع پر کہا کہ فوڈ اسٹریٹ کسی بھی شہر کی ثقافت کا اہم حصہ ہوتی ہے اور یہ شہری زندگی میں خوشگوار سرگرمیوں کا اضافہ کرتی ہے۔ انہوں نے کہا کہ وزیراعلی پنجاب مریم نواز شریف کے ویژن کے مطابق صوبہ بھر میں شہری سہولیات کی بہتری، خوبصورتی، صفائی اور معیاری تفریحی سرگرمیوں کے فروغ کے لئے عملی اقدامات کئے جا رہے ہیں اور لیہ میں فوڈ اسٹریٹ کا قیام اسی سلسلے کی عملی کڑی ہے۔انہوں نے کہا کہ جو افراد پہلے سے کھانے پینے کا کاروبار کر رہے ہیں انہیں بدستور کام کرنے کی اجازت ہوگی تاہم نئے آنے والے افراد کو باقاعدہ چیک کیا جائے گا ان کے کھانے کے معیار، صفائی کے انتظامات اور مقررہ سٹینڈرڈ کو جانچنے کے بعد ہی انہیں اجازت دی جائے گی تاکہ شہریوں کو معیاری اور محفوظ خوراک فراہم کی جا سکے۔ڈپٹی کمشنر نے کہا کہ فوڈ اسٹریٹ کے نظام کو باقاعدہ اور موثر انداز میں مانیٹر کیا جائے گا تاکہ اشیائے خورونوش کا معیار مثالی اور سٹینڈرڈ کے مطابق رہے کسی کو بھی غیر معیاری اشیاء فروخت کرنے یا زائد قیمت وصول کرنے کی اجازت نہیں دی جائے گی۔انہوں نے مزید کہا کہ فوڈ سٹریٹ غلہ منڈی میں موجود خالی پلاٹس پر بھی خصوصی توجہ دی جا رہی ہے اور انہیں بہتر بنا کر تفریحی سرگرمیوں کے لئے استعمال میں لایا جائے گا تاکہ خواتین، مرد اور بچے کھانے کے ساتھ ساتھ خوشگوار ماحول میں وقت گزار سکیں اور مزید سہولیات سے لطف اندوز
ہوں۔ڈپٹی کمشنر نے مزید کہا کہ اس سال ماہ رمضان کو بھی وزیراعلی پنجاب مریم نواز کی ہدایات کے مطابق خصوصی طور پر خوش آمدید کہا جا رہا ہے پہلی مرتبہ رمضان المبارک کو ایک باقاعدہ مذہبی تہوار کے طور پر خوش اسلوبی سے منایا جارہا ہے شہر بھر میں خصوصی انتظامات اور سجاوٹ کے ذریعے ایک نیا اور منفرد منظر دیکھنے کو مل رہا ہے۔ڈسٹرکٹ پولیس آفیسر حسن جاوید بھٹی نے کہا کہ فوڈ اسٹریٹ میں سیکیورٹی اور گشت کے نظام کو مزید موثر بنایا جائے گا باقاعدہ پٹرولنگ اور نگرانی کا نظام قائم کیا جا رہا ہے تاکہ شہری خود کو محفوظ محسوس کریں اور انہیں کسی قسم کی پریشانی کا سامنا نہ ہو۔اس موقع پر ڈپٹی کمشنر و دیگر نے فوڈ سٹریٹ میں انتظامات کا جائزہ لیا اور متعلقہ افسران کو ہدایت کی کہ فوڈ اسٹریٹ کو مستقل بنیادوں پر فعال، منظم اور مثالی بنایا جائے تاکہ یہ مقام ضلع لیہ کی نمایاں پہچان بن سکے۔
