فیملی ایجوکیشن ہیلتھ میلہ، صحت و آگاہی کے رنگ بکھر گئے، ڈپٹی کمشنر آصف علی ڈوگر کا افتتاح، فیملی پلاننگ، کھیلوں اور تفریحی سرگرمیوں میں شہریوں کی بھرپور شرکت

لیہ(نمائندہ لیہ ٹی وی)ہیلتھ اینڈ پاپولیشن ڈیپارٹمنٹ کے زیر اہتمام سپورٹس کمپلیکس میں فیملی ایجوکیشن ہیلتھ میلہ کا انعقاد کیا گیا۔ ڈپٹی کمشنر آصف علی ڈوگر نے لیڈیز گراؤنڈ میں ربن کاٹ کر ایک روزہ میلہ کا افتتاح کیا۔ اس موقع پر ایڈیشنل ڈپٹی کمشنر جنرل شبیر احمد ڈوگر، چیف ایگزیکٹو آفیسر ہیلتھ ڈاکٹر شاہد ریاض، چیف ایگزیکٹو آفیسر تعلیم محمد قیوم خان، ڈسٹرکٹ پاپولیشن ویلفیئر آفیسر مہتاب احمد، ڈیموگرافر توقیر شہزاد، تحصیل آفیسر عارف قریشی، ڈسٹرکٹ منیجر ماری سٹوپس مہر نوید ظفر، ڈسٹرکٹ سپورٹس آفیسر امتیاز احمد بھٹی، خواتین، بچوں اور طالبات کی بڑی تعداد موجود تھی۔ فیملی ایجوکیشنل ہیلتھ میلہ میں فیملیز اور بچوں کے لئے بچوں کے جھولے، میوزیکل چیئر، صحت مند بچوں کے مقابلے، موسیقی، کھیلوں کے مقابلے، مداری، فری میڈیکل کیمپ اور معلوماتی سٹالز لگائے گئے تھے۔ ڈپٹی کمشنر آصف علی ڈوگر نے اس موقع پر مختلف سٹالز کا معائنہ کیا اور ڈسٹرکٹ پاپولیشن ویلفیئر آفس کی ٹیم کی کارکردگی کو سراہا۔ اس موقع پر ڈسٹرکٹ سپورٹس ڈیپارٹمنٹ اور پنجاب کالج کی ٹیموں کے مابین رسہ کشی کا مقابلہ ہوا جو پنجاب کالج کی طالبات نے جیت لیا۔ فیملی پلاننگ میلہ میں پاکستان آئیڈل کے مقابلوں میں حصہ لینے والی ابھرتی ہوئی گلوکارہ روش روباب نے اپنے فن کا مظاہرہ کیا اور اپنی سریلی آواز کا جادو جگا کر خوب داد سمیٹی۔ تقریب سے خطاب کرتے ہوئے ڈپٹی کمشنر نے اس موقع پر گفتگو کرتے ہوئے کہا کہ آبادی اور وسائل میں توازن نہ ہونے سے مسائل جنم لیتے ہیں۔ انہوں نے کہا کہ بے ہنگم آبادی کے کے کنٹرول کے لئے حکومت پنجاب کی طرف سے مختلف پلیٹ فارمز استعمال کئے جا رہے ہیں۔ انہوں نے کہا کہ فیملی پلاننگ میلہ آگہی کا ایک بہترین ٹول ہے جہاں فیملی پلاننگ بارے مفید معلومات فراہم کی گئیں۔ بعد ازاں ڈپٹی کمشنر نے سپورٹس میں حصہ لینے والی طالبات میں انعامات اور افسران میں شیلڈز تقسیم کیں۔