نیا سال، نیا عزم: لیہ میں انسداد پولیو مہم کے بھرپور آغاز کا فیصلہ، 2 فروری سے شروع مہم میں 4 لاکھ 26 ہزار سے زائد بچوں کو پولیو سے بچاؤ کے قطرے پلانے کا ہدف

لیہ(نمائندہ لیہ ٹی وی )نیا سال۔نیا عزم۔ نئے سال کے آغاز کے ساتھ ہی ضلع انتظامیہ لیہ نے پولیو کے مکمل خاتمے کے عزم کا اعادہ کر دیا ہے۔ بچوں کو پولیو جیسی موذی بیماری سے محفوظ رکھنے کے لیے ضلع بھر میں مربوط اور مؤثر اقدامات کیے جا رہے ہیں تاکہ کوئی بھی بچہ عمر بھر کی معذوری کا شکار نہ ہو،ڈپٹی کمشنر آصف علی ڈوگر تفصیل کے مطابق انسداد پولیو مہم کے انتظامات کا اجلاس ڈپٹی کمشنر اصف علی ڈوگر کی زیر صدارت منعقد ہوا۔ اجلاس میں ایڈیشنل ڈپٹی کمشنرز محمد شاہد ملک،شبیر احمد ڈوگر،اسسٹنٹ کمشنرز رانا زوہیب کریم،محبوب اقبال ہنجرا،سی ای او ہیلتھ ڈاکٹر شاہد ریاض،ایم ایس ڈاکٹر غلام محی الدین،ڈاکٹر محمد یونس کلیہ،ڈبلیو ایچ او حکام و دیگر متعلقہ افسران نے شرکت کی۔ڈپٹی کمشنر اصف علی ڈوگر نے اجلاس سے خطاب کرتے ہوئے کہا کہ پولیو کا خاتمہ ہم سب کی مشترکہ ذمہ داری ہے اور منظم حکمتِ عملی، مؤثر نگرانی اور باہمی تعاون سے اس موذی مرض کا مکمل خاتمہ ممکن ہے۔ انہوں نے ہدایت کی کہ 2 فروری سے شروع ہونے والی انسدادِ پولیو مہم کے دوران پانچ سال تک کی عمر کے 4 لاکھ 26 ہزار سے زائد بچوں کو پولیو سے بچاؤ کے قطرے پلانے کا مقررہ ہدف ہر صورت پورا کیا جائے۔انہوں نے کہا کہ مہم کی کامیابی کے لیے تمام محکمے باہمی رابطے کو مزید مضبوط بنائیں، سول سوسائٹی کے تعاون کو یقینی بنایا جائے اور علماء کرام جمعہ کے خطبات میں پولیو کے نقصانات اور حفاظتی تدابیر سے متعلق عوام میں آگاہی پیدا کریں۔اجلاس میں سی ای او ہیلتھ ڈاکٹر شاہد ریاض نے بریفنگ دیتے ہوئے بتایا کہ انسدادِ پولیو مہم کے لیے تمام انتظامات مکمل کر لیے گئے ہیں۔ مہم کے دوران ضلع بھر میں 1797 سے زائد ٹیمیں فرائض انجام دیں گی جبکہ 58 ٹرانزٹ پوائنٹس کے علاوہ نشیبی علاقوں اور تھل کے علاقوں پر خصوصی توجہ دی جائے گی تاکہ کوئی بھی بچہ پولیو کے قطروں سے محروم نہ رہے۔