کروڑ لعل عیسن (نمائندہ لیہ ٹی وی )موضع بصیرہ میں پیش آنے والے دلخراش حادثے میں جاں بحق ہونے والی تین سگی بہنوں کی رسمِ قل خوانی ادا کر دی گئی۔ علاقے کی فضا آج بھی سوگوار رہی، ہر آنکھ اشکبار اور ہر دل غم سے بوجھل نظر آیا۔ معصوم بچیوں کی ناگہانی موت نے پورے علاقے کو ہلا کر رکھ دیا ہے۔قل خوانی میں سابق ضلعی چیئرمین ملک عمر علی اولکھ، سابق تحصیل ناظم سردار سجاد خان سیہڑ، منور شاہ سمیت معززین علاقہ اور بڑی تعداد میں شہریوں نے شرکت کی۔ اس موقع پر ہر زبان پر ایک ہی سوال تھا کہ آخر یہ معصوم کلیاں کس جرم کی سزا پا گئیں؟میڈیا سے گفتگو کرتے ہوئے ملک عمر علی اولکھ اور سردار سجاد خان سیہڑ نے کہا کہ ہم اس غمزدہ خاندان کے دکھ میں برابر کے شریک ہیں اور اس کڑے وقت میں انہیں تنہا نہیں چھوڑیں گے۔ انہوں نے اعلان کیا کہ وزیراعلیٰ پنجاب اور متعلقہ انتظامیہ سے رابطہ کر کے متاثرہ خاندان کی مالی معاونت کو یقینی بنایا جائے گا تاکہ اس ٹوٹے ہوئے گھر کو کچھ سہارا مل سکے۔شرکاء نے حکومت سے مطالبہ کیا کہ واقعے کی مکمل تحقیقات کی جائیں اور آئندہ ایسے سانحات سے بچاؤ کے لیے ٹھوس اقدامات کیے جائیں، تاکہ کسی اور گھر کا چراغ اس طرح نہ بجھے اور کوئی ماں یوں اپنے جگر گوشے نہ کھوئے۔
