لیہ: وزیراعلیٰ پنجاب مریم نواز شریف کے فلیگ شپ فلاحی پروگرام دھی رانی کے چوتھے فیز کے تحت ضلع لیہ کے 200 مستحق جوڑے شادی کے بندھن میں بندھیں گے۔ اجتماعی شادیوں کی پروقار تقریب 29 نومبر کو سپورٹس کمپلیکس لیہ میں منعقد ہوگی۔اس سلسلے میں ڈپٹی کمشنر آصف علی ڈوگر کی زیر صدارت جائزہ اجلاس منعقد ہوا،
جس میں ڈپٹی کمشنر نے متعلقہ محکموں کو تقریب کے انتظامات بروقت مکمل کرنے اور شریک جوڑوں و ان کے اہل خانہ کو بہترین سہولیات فراہم کرنے کی ہدایت کی۔اجلاس کو بتایا گیا کہ دھی رانی پروگرام کے تحت مستحق جوڑوں کو اے ٹی ایم کارڈ کے ذریعے 2 لاکھ روپے سلامی، مفت عروسی لباس اور مہمانوں کے لیے کھانے کی سہولت فراہم کی جائے گی۔ڈپٹی کمشنر نے کہا کہ دھی رانی پروگرام کم وسائل رکھنے والے خاندانوں کے لیے ایک قابل تحسین فلاحی اقدام ہے، جس کا مقصد مستحق والدین کی مالی مشکلات کم کرنے کے ساتھ ان کی بیٹیوں کو باوقار انداز میں رخصت کرنے کا موقع فراہم کرنا ہے۔انہوں نے سکیورٹی، ٹریفک، پارکنگ، بیٹھنے کے انتظامات اور کھانے سمیت تمام ضروری امور کی جامع منصوبہ بندی یقینی بنانے کی ہدایت کی۔ ڈی پی او حسن جاوید بھٹی نے فول پروف سکیورٹی اور پارکنگ انتظامات کی یقین دہانی کرائی۔اجلاس میں ایڈیشنل ڈپٹی کمشنر سوشل سروسز خضر ظہور، ڈپٹی ڈائریکٹر کالجز ذوالفقار علی حیدری، ڈی ایس پی سپیشل برانچ جام سلیم اور دیگر متعلقہ افسران نے شرکت کی۔
