لیہ: وزیراعلیٰ پنجاب مریم نواز شریف کے وژن کے مطابق ضلع لیہ میں کھیلوں اور تفریحی سہولیات کی فراہمی کے لیے مریم نواز سپورٹس ارینا کی تعمیر، تزئین و آرائش اور بحالی کا کام تیزی سے جاری ہے۔ ڈپٹی کمشنر آصف علی ڈوگر نے زیر تعمیر سپورٹس ارینا کا دورہ کیا اور جاری ترقیاتی کاموں کا تفصیلی معائنہ کیا۔اس موقع پر انہوں نے متعلقہ افسران کو کام کی رفتار مزید تیز کرنے اور تعمیراتی معیار یقینی بنانے کی ہدایت کی۔ ڈپٹی کمشنر نے کہا کہ مریم نواز سپورٹس ارینا ایک ملٹی سپورٹس اور تفریحی مقام ہوگا، جہاں اوپن ایئر کیفے، ان ڈور فٹبال اور بچوں کے لیے پلے لینڈ سمیت مختلف سہولیات دستیاب ہوں گی۔انہوں نے کہا کہ منصوبے کی تکمیل سے شہریوں، بالخصوص نوجوانوں اور بچوں کو کھیلوں، صحت مند تفریح اور مثبت سرگرمیوں کے لیے بہترین ماحول میسر آئے گا۔ نوجوانوں کو کھیلوں کے بہتر مواقع فراہم کرنا حکومت پنجاب کی ترجیحات میں شامل ہے۔دورے کے موقع پر ایڈیشنل ڈپٹی کمشنرز شبیر احمد ڈوگر، خضر ظہور، ڈپٹی ڈائریکٹر ڈویلپمنٹ عصمت اللہ، آفیسر انفراسٹرکچر ضلع کونسل سجاد گشکوری سمیت دیگر متعلقہ افسران بھی موجود تھے۔بعد ازاں ڈپٹی کمشنر آصف علی ڈوگر نے جنرل بس اسٹینڈ لیہ کا بھی دورہ کیا اور وہاں جاری تعمیر و مرمت اور تزئین و آرائش کے کاموں کا جائزہ لیا۔
