لیہ: ڈپٹی کمشنر آصف علی ڈوگر نے ضلع لیہ کی تمام تحصیلوں کے شہری و دیہی علاقوں میں مختلف اقسام کی مچھلی کے تھوک اور پرچون نرخ مقرر کرتے ہوئے نیا سرکاری نرخ نامہ جاری کر دیا ہے، جس کا اطلاق فوری طور پر ہوگا۔جاری کردہ نرخ نامے کے مطابق رہو، موری، گراس کارپ، تھیلا اور گلفام مچھلی کے آدھا کلو تک وزن پر تھوک نرخ 400 روپے اور پرچون نرخ 450 روپے فی کلو مقرر کیے گئے ہیں، جبکہ دو کلو سے زائد وزن پر تھوک نرخ 650 روپے اور پرچون نرخ 700 روپے فی کلو ہوں گے۔کلاریاس اور پنگاسیئس مچھلی کے ایک کلو سے کم وزن پر تھوک نرخ 330 روپے اور پرچون نرخ 380 روپے مقرر کیے گئے ہیں۔ تلاپیا مچھلی کے ایک کلو سے کم وزن پر تھوک نرخ 500 روپے اور پرچون نرخ 550 روپے ہوں گے، جبکہ دیگر مقامی مچھلیوں کے نرخ بالترتیب 350 اور 400 روپے فی کلو مقرر کیے گئے ہیں۔اسی طرح بگ ہیڈ کارپ، ملی، کھگا، ساول اور سنگھاڑا مچھلی کے وزن کے مختلف درجات کے مطابق تھوک اور پرچون نرخ بھی مقرر کر دیے گئے ہیں۔ڈپٹی کمشنر آصف علی ڈوگر نے تمام مچھلی فروشوں، تھوک فروشوں اور سپر مارکیٹس کو سرکاری نرخ نامہ نمایاں جگہ پر آویزاں کرنے کی ہدایت کرتے ہوئے واضح کیا کہ باسی، غیر معیاری اور برف کے بغیر مچھلی کی فروخت ممنوع ہے۔انہوں نے کہا کہ مچھلی کا وزن تصدیق شدہ الیکٹرانک ترازو کے ذریعے کیا جائے۔ زائد قیمت وصول کرنے یا کم وزن دینے والوں کے خلاف قانونی کارروائی عمل میں لائی جائے گی۔ ڈپٹی کمشنر نے تمام اسسٹنٹ کمشنرز اور پرائس کنٹرول مجسٹریٹس کو نرخ نامے پر سختی سے عملدرآمد یقینی بنانے کی ہدایت بھی کی۔
