لیہ: اسسٹنٹ کمشنر چوبارہ ذوالفقار صابر کی زیر صدارت خصوصی انسداد پولیو مہم کے انتظامات کا جائزہ لینے کے لیے اجلاس منعقد ہوا، جس میں ڈپٹی ڈسٹرکٹ ہیلتھ آفیسر مہر نبیل احمد سمیت دیگر متعلقہ افسران نے شرکت کی۔اجلاس میں بتایا گیا کہ خصوصی انسداد پولیو مہم 2 سے 5 نومبر تک جاری رہے گی۔ اس دوران پانچ سال تک کی عمر کے بچوں کو پولیو سے بچاؤ کے قطرے پلانے کے اہداف، فیلڈ ٹیموں کی تشکیل، تیاریوں اور کارکردگی سمیت دیگر انتظامی امور کا جائزہ لیا گیا۔اسسٹنٹ کمشنر ذوالفقار صابر نے ہدایت کی کہ مہم کے دوران گھر گھر جا کر بچوں کو پولیو سے بچاؤ کے قطرے پلانے کا عمل مؤثر بنایا جائے اور کوئی بچہ ویکسینیشن سے محروم نہ رہے۔ انہوں نے متعلقہ افسران کو فیلڈ ٹیموں کی باقاعدہ نگرانی، مقررہ اہداف کے حصول اور رہ جانے والے بچوں کی فوری ویکسینیشن یقینی بنانے کی ہدایت بھی کی۔انہوں نے کہا کہ پولیو کے مکمل خاتمے کے لیے تمام متعلقہ محکمے باہمی رابطے اور مربوط حکمت عملی کے تحت اپنی ذمہ داریاں ادا کریں۔
