لیہ: وزیراعلیٰ پنجاب مریم نواز شریف کے وژن اور صوبائی وزیر تعلیم رانا سکندر حیات کی ہدایات کے مطابق ضلع لیہ میں سٹیم مقابلہ جات 2026 کا انعقاد کیا گیا۔ اس سلسلے میں گورنمنٹ ماڈل ہائی سکول لیہ میں ضلعی سطح کے مقابلوں کی تقریب منعقد ہوئی جس میں مختلف سرکاری سکولوں کے طلبہ نے سائنس، ٹیکنالوجی، انجینئرنگ، آرٹس اور ریاضی کے شعبوں میں اپنی تخلیقی صلاحیتوں اور سائنسی مہارتوں کا مظاہرہ کرتے ہوئے مختلف پراجیکٹس پیش کیے۔
تقریب کے مہمان خصوصی ایڈیشنل ڈپٹی کمشنر سوشل سروسز خضر ظہور تھے جبکہ چیف ایگزیکٹو آفیسر تعلیم عبدالحفیظ بھی ان کے ہمراہ تھے۔اس موقع پر اے ڈی سی سوشل سروسز خضر ظہور نے مختلف پراجیکٹس اور سٹالز کا معائنہ کیا اور طلبہ کی تخلیقی کاوشوں کو سراہا۔ انہوں نے اس موقع پر خطاب کرتے ہوئے کہا کہ سٹیم مقابلہ جات طلبہ میں سائنسی سوچ، تحقیق، تخلیقی صلاحیتوں اور جدید علوم کے فروغ کا بہترین ذریعہ ہیں ایسے تعلیمی مقابلوں سے نوجوان نسل کو اپنی صلاحیتیں اجاگر کرنے اور عملی طور پر نت نئی ایجادات اور اختراعات پیش کرنے کے مواقع میسر آتے ہیں۔ انہوں نے کہا کہ وزیراعلیٰ پنجاب مریم نواز شریف کی قیادت میں صوبائی حکومت معیاری تعلیم کے فروغ اور طلبہ کو جدید تعلیمی تقاضوں سے ہم آہنگ کرنے کے لیے خصوصی اقدامات کر رہی ہے۔ انہوں نے مقابلوں میں حصہ لینے والے طلبہ اور ان کی رہنمائی کرنے والے اساتذہ کی کاوشوں کو بھی سراہا۔ ضلعی سطح کے سٹیم مقابلوں میں گورنمنٹ گرلز ہائر سیکنڈری ماڈل سکول لیہ نے پہلی، گورنمنٹ گرلز ہائی سکول چک نمبر 148 کوثر آباد نے دوسری جبکہ گورنمنٹ گرلز ہائی سکول اسلامیہ نے تیسری پوزیشن حاصل کی۔ تقریب میں محکمہ تعلیم کے افسران، مختلف سکولوں کے سربراہان اور اساتذہ نے بھی شرکت کی۔ تقریب کی میزبانی کے فرائض ارشاد کھوکھر نے انجام دیے۔
