لیہ: ڈپٹی کمشنر آصف علی ڈوگر نے کہا ہے کہ گندم کی زیادہ پیداوار فوڈ سکیورٹی کے لیے ناگزیر ہے جبکہ کاشتکاروں کی خوشحالی حکومت پنجاب کی ترجیحات میں شامل ہے۔
ضلع لیہ میں رواں سال چھ لاکھ ایکڑ سے زائد رقبے پر گندم کی کاشت کا ہدف مقرر کیا گیا ہے۔
ان خیالات کا اظہار انہوں نے محکمہ زراعت کے زیر اہتمام نجی فرٹیلائزر کمپنی کے تعاون سے مقامی مارکی میں منعقدہ سرسبز گندم کنونشن سے بطور مہمان خصوصی خطاب کرتے ہوئے کیا۔
کنونشن میں سابق صوبائی وزیر مہر اعجاز احمد اچلانہ، ایڈیشنل ڈپٹی کمشنر سوشل سروسز خضر ظہور، ڈپٹی ڈائریکٹر زراعت عاشق حسین، ڈائریکٹر پلانٹ پروٹیکشن عمران فراز اور ترقی پسند کاشتکاروں کی بڑی تعداد نے شرکت کی۔ڈپٹی کمشنر آصف علی ڈوگر نے کہا کہ زراعت اور کاشتکار ملکی معیشت میں اہم کردار ادا کرتے ہیں۔
وزیراعلیٰ پنجاب مریم نواز شریف کی قیادت میں حکومت کسان کارڈ، زرعی مشینری کی فراہمی اور زرعی قرضوں پر سبسڈی سمیت مختلف اقدامات کے ذریعے کاشتکاروں کی معاونت اور زرعی پیداوار میں اضافے کے لیے کام کر رہی ہے۔انہوں نے بتایا کہ ضلع لیہ میں گزشتہ سال گندم کی کاشت کا ہدف 100 فیصد حاصل کیا گیا تھا جبکہ رواں سال بھی مقررہ ہدف کے حصول کے لیے محکمہ زراعت کی رہنمائی اور کاشتکاروں کے تعاون سے اقدامات کیے جائیں گے۔ڈپٹی کمشنر نے کہا کہ ضلع لیہ کی زرخیز زمینیں اور محنتی کاشتکار زرعی ترقی کے لیے اہم اثاثہ ہیں۔ جدید زرعی طریقوں کو اپنانے، معیاری زرعی مداخل کے استعمال اور بہتر پیداواری حکمت عملی سے فی ایکڑ پیداوار میں اضافہ کیا جا سکتا ہے۔کنونشن کے اختتام پر نمایاں کارکردگی کا مظاہرہ کرنے والے ترقی پسند کاشتکاروں میں انعامات اور شیلڈز تقسیم کی گئیں۔
