لیہ: ڈپٹی کمشنر لیہ آصف علی ڈوگر کے احکامات پر انسدادِ تجاوزات، گراں فروشی کے تدارک اور شہریوں کو معیاری طبی سہولیات کی فراہمی کے لیے انتظامی اقدامات جاری ہیں۔ اس سلسلے میں ایڈیشنل ڈپٹی کمشنر ہیڈ کوارٹرز و انفورسمنٹ محمد اویس سرور چشتی نے ایس ڈی ای او پیرا محمد طاہر کے ہمراہ شہر کے مختلف مقامات کا دورہ کیا۔انسدادِ تجاوزات کارروائی کے دوران سڑکوں، فٹ پاتھوں اور عوامی مقامات پر قائم تجاوزات کے خاتمے کے لیے اقدامات کیے گئے۔ اے ڈی سی نے متعلقہ ٹیموں کو ہدایت کی کہ تجاوزات کے دوبارہ قیام کی روک تھام کے لیے مؤثر اقدامات جاری رکھے جائیں تاکہ ٹریفک کی روانی بہتر بنانے اور پیدل چلنے والوں کو سہولت فراہم کرنے میں مدد مل سکے۔انہوں نے سہولت بازار کا معائنہ کرتے ہوئے اشیائے ضروریہ کی دستیابی، سرکاری نرخ نامے کی نمایاں آویزاں اور اس پر عمل درآمد کا جائزہ لیا۔ اس موقع پر پھل اور سبزیاں مقررہ نرخوں سے زائد قیمتوں پر فروخت کرنے والے دکانداروں کو جرمانے بھی عائد کیے گئے۔بعد ازاں محمد اویس سرور چشتی نے ڈسٹرکٹ ہیڈ کوارٹرز ہسپتال لیہ کا دورہ کیا اور او پی ڈی، مردانہ و زنانہ وارڈز، ایمرجنسی، فارمیسی، ادویات کے اسٹاک اور دیگر انتظامی امور کا جائزہ لیا۔ انہوں نے ہدایت کی کہ ادویات کی دستیابی، صفائی ستھرائی اور مریضوں کو بروقت معیاری طبی سہولیات کی فراہمی یقینی بنائی جائے۔
