لیہ :ایڈیشنل ڈپٹی کمشنر میونسپل سروسز شبیر احمد ڈوگر نے ایگری انجینئرنگ ورکشاپ لیہ ڈویژن کا دورہ کیا اور دفتری و عملی امور، عملے کی حاضری، زرعی مشینری کی دستیابی اور مرمتی کاموں کا تفصیلی جائزہ لیا۔
اس موقع پر انہوں نے ورکشاپ میں موجود زرعی مشینری اور ہیوی ڈیوٹی آلات کا معائنہ کیا جبکہ مشینری کی دیکھ بھال، مرمت کے انتظامات اور دستیاب دفتری وسائل کے استعمال کا بھی جائزہ لیا۔ ایڈیشنل ڈپٹی کمشنر نے ہدایت کی کہ زرعی مشینری اور آلات کو فعال حالت میں رکھا جائے اور ان کی باقاعدہ دیکھ بھال و مرمت یقینی بنائی جائے تاکہ ضرورت کے وقت مشینری کی دستیابی میں تاخیر نہ ہو۔
انہوں نے عملے کو اپنی ذمہ داریاں مؤثر انداز میں ادا کرنے، ورکشاپ میں نظم و ضبط برقرار رکھنے اور مرمتی کاموں کا معیار یقینی بنانے کی ہدایت کرتے ہوئے کہا کہ متعلقہ شعبہ جات کو بروقت خدمات فراہم کی جائیں تاکہ زرعی سرگرمیوں میں سہولت پیدا ہو اور سرکاری وسائل کا مؤثر استعمال ممکن بنایا جا سکے۔
اس موقع پر ڈپٹی ڈائریکٹر زرعی انجینئرنگ شیخ شعیب ظہیر اور اسسٹنٹ ڈائریکٹر زرعی انجینئرنگ ڈاکٹر غلام مرتضیٰ بھٹی بھی موجود تھے۔
