لیہ : ضلع لیہ میں خصوصی انسداد پولیو مہم 2 سے 5 نومبر تک جاری رہے گی، جس کے دوران پانچ سال تک کی عمر کے 4 لاکھ 35 ہزار 690 بچوں کو پولیو سے بچاؤ کے قطرے پلانے کا ہدف مقرر کیا گیا ہے۔اس سلسلے میں ایڈیشنل ڈپٹی کمشنر ہیڈکوارٹر محمد اویس سرور کی زیرِ صدارت اجلاس منعقد ہوا،
جس میں چیف ایگزیکٹو آفیسر ہیلتھ ڈاکٹر شاہد ریاض، ڈی ای او تعلیم گل شیر، ڈاکٹر یونس کلیہ، ڈی ایچ او ڈاکٹر غلام محی الدین، ڈسٹرکٹ پولیو آفیسر ڈبلیو ایچ او ڈاکٹر شاہد حسین، شفیق تھند اور دیگر متعلقہ افسران نے شرکت کی۔اجلاس کو بتایا گیا کہ مہم کے دوران ضلع کی 44 یونین کونسلوں میں 1797 ٹیمیں فرائض انجام دیں گی، جن میں 1661 موبائل، 78 فکسڈ اور 58 ٹرانزٹ ٹیمیں شامل ہیں، جبکہ 348 ایریا انچارجز ٹیموں کی نگرانی کریں گے۔ ٹیمیں گھر گھر جا کر بچوں کو پولیو سے بچاؤ کے قطرے پلانے کے علاوہ مقررہ مقامات پر بھی ویکسینیشن یقینی بنائیں گی۔اس موقع پر ایڈیشنل ڈپٹی کمشنر محمد اویس سرور نے متعلقہ محکموں کو ہدایت کی کہ مہم کو مؤثر بنانے کے لیے مربوط حکمت عملی اپنائی جائے، ٹیموں کی کڑی نگرانی کی جائے اور کوئی بچہ پولیو سے بچاؤ کے قطروں سے محروم نہ رہے۔ انہوں نے رہ جانے والے بچوں کی بروقت ویکسینیشن یقینی بنانے پر بھی زور دیا۔انہوں نے والدین سے اپیل کی کہ وہ پانچ سال تک کی عمر کے بچوں کو پولیو سے بچاؤ کے قطرے ضرور پلوائیں اور مہم کے دوران محکمہ صحت کی ٹیموں سے بھرپور تعاون کریں۔
