لیہ: وزیر اعلیٰ پنجاب اور سیکرٹری ایمرجنسی سروسز ڈیپارٹمنٹ کی ہدایات پر ریسکیو 1122 لیہ کے زیرِ اہتمام ڈسٹرکٹ ہیڈکوارٹر ہسپتال لیہ کے گائنی وارڈ میں ہنگامی صورتحال سے نمٹنے کے لیے موک ایکسرسائز کا انعقاد کیا گیا۔
ڈسٹرکٹ ایمرجنسی آفیسر ڈاکٹر سجاد احمد ملک کی زیرِ نگرانی ہونے والی اس مشق کا مقصد ہنگامی حالات میں فوری ردِعمل، مریضوں کے محفوظ انخلاء، فائر سیفٹی اقدامات اور ریسکیو 1122 و ہسپتال انتظامیہ کے درمیان رابطہ کاری کو جانچنا اور بہتر بنانا تھا۔
موک ایکسرسائز میں ایم ایس ڈی ایچ کیو ہسپتال لیہ، ریسکیو 1122 کے افسران و اہلکاروں اور ہسپتال کے عملے نے شرکت کی۔ شرکاء نے عملی مشق کے ذریعے ہنگامی صورتحال سے نمٹنے کی تیاریوں کا مظاہرہ کیا۔اس موقع پر ڈسٹرکٹ ایمرجنسی آفیسر ڈاکٹر سجاد احمد ملک نے کہا کہ ایسی مشقیں ہنگامی حالات میں جانی نقصان کم کرنے، مریضوں کی حفاظت یقینی بنانے اور متعلقہ اداروں کے درمیان مؤثر رابطہ کاری کے لیے اہم ہیں۔ انہوں نے کہا کہ ریسکیو 1122 لیہ عوام کو بروقت اور مؤثر ایمرجنسی سروسز فراہم کرنے کے لیے ہمہ وقت تیار ہے۔
