لاہور (لیہ ٹی وی)مہنگائی سے متاثرہ شہریوں کو ریلیف فراہم کرنے کے لیے وزیراعلیٰ پنجاب مریم نواز شریف کی ہدایت پر سستی نہیں بلکہ مفت سبزی، سانجھی سبزی کے نام سے ایک منفرد عوامی فلاحی منصوبے کا آغاز کر دیا گیا ہے۔
منصوبے کا آغاز ضلع مظفر گڑھ سے کیا گیا ہے، جہاں سرکاری عمارتوں اور دیہی علاقوں کی سرکاری اراضی پر عوام کے لیے موسمی سبزیوں کی کاشت کی جا رہی ہے۔
حکام کے مطابق مجموعی طور پر139 کنال اراضی پر قائم140 پلاٹس میں مختلف اقسام کی سبزیاں اگائی جا رہی ہیں، جبکہ مقامی افراد کو ضرورت کے مطابق مفت سبزیاں فراہم کرنے کا سلسلہ بھی شروع ہو چکا ہے۔
"سانجھی سبزی” منصوبے کا آغاز مظفر گڑھ میں مسیحی برادری کے ایک گاؤں سے کیا گیا، جس کے بعد مقامی افراد بھی رضاکارانہ طور پر دوسروں کے لیے سبزیاں کاشت کرنے میں حصہ لینے لگے۔
وزیراعلیٰ پنجاب مریم نواز شریف نے اس منصوبے کو عوامی فلاح کا بہترین نمونہ قرار دیتے ہوئے پنجاب کے تمام ڈپٹی کمشنرز کو اپنے اضلاع میں بھی "سانجھی سبزی” منصوبہ شروع کرنے کی ہدایت جاری کر دی ہے۔
دریں اثنا وزیراعلیٰ پنجاب سےڈپٹی کمشنر مظفر گڑھ محمد عثمان طاہر جپہ نے ملاقات کی، جس میں مریم نواز شریف نے اس عوام دوست اقدام کو سراہتے ہوئے انہیں **چیف منسٹر میرٹ بیج اور ایک لاکھ روپے نقد انعام بھی دیا۔
