کراچی (شوبز ڈیسک) اداکارہسجل علی کے حالیہ ڈرامے پر اداکارہ اور میزبان نادیہ خان کے تبصرے کے بعد شوبز انڈسٹری میں نیا تنازع سامنے آ گیا ہے۔ نادیہ خان کی رائے پر سینئر اداکارہ صبا فیصل نے سخت ردعمل دیا، جس کے بعد سوشل میڈیا پر مداحوں کے درمیان بھی بحث شروع ہو گئی۔
رپورٹس کے مطابق نادیہ خان نے اپنے تبصرے میں سجل علی کی اداکاری کے بجائے ڈرامے کی ہدایت کاری، اسکرپٹ اور مجموعی پیشکش پر سوالات اٹھائے تھے۔ تاہم ان کے بیان کو بعض حلقوں نے سجل علی پر تنقید کے طور پر لیا، جس پر صبا فیصل نے نادیہ خان کو آڑے ہاتھوں لیا۔
دوسری جانب سوشل میڈیا پر متعدد صارفین نادیہ خان کے دفاع میں سامنے آئے اور مؤقف اختیار کیا کہ انہوں نے سجل علی کی صلاحیتوں پر نہیں بلکہ ڈرامے کی کہانی، ہدایت کاری اور اسکرپٹ کے معیار پر تنقیدی رائے دی تھی، جو ہر ناقد کا حق ہے۔
واقعے کے بعد سوشل میڈیا پر شوبز شخصیات کے تبصروں، تنقید کے انداز اور اظہارِ رائے کی حدود پر بھی نئی بحث چھڑ گئی ہے، جبکہ مداح مختلف آراء کے ساتھ اپنی پسندیدہ شخصیات کی حمایت کرتے نظر آ رہے ہیں۔
