لیہ (نمائندہ لیہ ٹی وی)موجودہ ملکی صورتحال کے پیش نظر ضلع لیہ میں اقلیتی برادری کے تحفظ کو یقینی بنانے کے لیے پولیس کی جانب سے چرچ ہائے پر سکیورٹی کے سخت انتظامات کر دیے گئے ہیں۔ اس سلسلے میں ڈسٹرکٹ پولیس آفیسر حسن جاوید بھٹی نے خود مختلف گرجا گھروں کا دورہ کیا اور سکیورٹی انتظامات کا تفصیلی جائزہ لیا۔ڈی پی او لیہ نے چرچ ہائے پر تعینات پولیس افسران و اہلکاروں سے ملاقات کی، ڈیوٹی پوائنٹس کا معائنہ کیا اور سکیورٹی پلان پر عملدرآمد کی جانچ پڑتال کی۔ انہوں نے ہدایت کی کہ اقلیتی برادری کے مذہبی مقامات پر کسی قسم کی غفلت برداشت نہیں کی جائے گی اور ہر صورت فول پروف سکیورٹی کو یقینی بنایا جائے۔ڈی پی او حسن جاوید بھٹی نے کہا کہ ضلع بھر میں موجود تمام چرچ ہائے پر لیہ پولیس کے مسلح افسران اور ملازمان تعینات ہیں جبکہ ڈی ایس پیز اور ایس ایچ اوز خود فیلڈ میں موجود رہ کر سکیورٹی انتظامات کی نگرانی کر رہے ہیں۔ انہوں نے کہا کہ اقلیتی برادری کا تحفظ پولیس کی اولین ترجیحات میں شامل ہے، جس کے لیے تمام دستیاب وسائل بروئے کار لائے جا رہے ہیں۔انہوں نے مزید کہا کہ کسی بھی مشکوک سرگرمی یا ناخوشگوار واقعے سے نمٹنے کے لیے فوری ردِعمل کا مؤثر نظام قائم کر دیا گیا ہے تاکہ شہریوں، بالخصوص اقلیتی برادری، کو مکمل تحفظ فراہم کیا جا سکے۔ پولیس امن و امان کے قیام اور بین المذاہب ہم آہنگی کے فروغ کے لیے پرعزم ہے اور ضلع لیہ میں تمام شہری بلا خوف و خطر اپنی مذہبی عبادات انجام دے سکیں گے۔
