ضلع لیہ میں امن و امان کے قیام کے لیے مربوط اقدامات جاری، ڈی پی او حسن جاوید بھٹی کا کہنا ہے کہ مساجد، حساس مقامات اور دریائی پوسٹوں پر سکیورٹی سخت، میڈیا مثبت کردار ادا کرے

لیہ(نمائندہ لیہ ٹی وی )وزیر اعلی پنجاب مریم نواز شریف کے احکامات پر ضلع لیہ میں امن و امان کے قیام کے لیے مشترکہ اور مربوط اقدامات جاری ہیں۔ موجودہ صورتحال کے پیش نظر ضلعی انتظامیہ اور پولیس باہمی تعاون سے قانون کی عملداری کو یقینی بنا رہی ہیں۔ اتحاد، باہمی احترام اور رواداری ہی پائیدار امن کی بنیاد ہیں اور تمام طبقات بالخصوص میڈیا ریاست کا اہم ستون ہونے کے ناطے مثبت اور ذمہ دارانہ کردار ادا کریں۔ معاشرے میں برداشت، ہم آہنگی اور بھائی چارے کے فروغ سے ہی امن کا خواب شرمندہ تعبیر ہو سکتا ہے۔یہ بات ڈسٹرکٹ پولیس آفیسر حسن جاوید بھٹی نے ڈپٹی کمشنر کمیٹی روم میں میڈیا ٹاک کرتے ہوئے کہی۔ اس موقع پر ایڈیشنل ڈپٹی کمشنر جنرل شبیر احمد ڈوگر اور میڈیا نمائندگان موجود تھے۔ ڈی پی او حسن جاوید بھٹی نے کہا کہ ضلع بھر میں اتحاد کی فضا قائم ہے اور امن و امان کی صورتحال کو مزید مستحکم بنانے کے لیے تمام وسائل بروئے کار لائے جا رہے ہیں۔ انہوں نے کہا کہ مساجد بالخصوص نماز جمعہ اور تراویح کے اوقات میں سکیورٹی کے خصوصی انتظامات کیے گئے ہیں جبکہ حساس مقامات پر پولیس کی نفری بڑھا دی گئی ہے۔ڈی پی او نے کہا کہ تمام شہری وہ اپنے ارد گرد کے ماحول پر نظر رکھیں اور کسی بھی مشکوک یا غیر متعلقہ شخص کی موجودگی کی فوری اطلاع پولیس کو دیں تاکہ بروقت کارروائی عمل میں لائی جا سکے۔ انہوں نے میڈیا نمائندگان کے سوالات کے جواب دیتے ہوئے بتایا کہ دریائی پوسٹوں پر سکیورٹی کو مزید مؤثر بنایا گیا ہے، کشتیوں کے ذریعے سفر کرنے والے افراد کی مکمل جانچ پڑتال کی جا رہی ہے اور ان کے شناختی کارڈ باقاعدگی سے چیک کیے جا رہے ہیں تاکہ کسی بھی ناخوشگوار واقعہ سے پیشگی بچا جا سکے۔ایڈیشنل ڈپٹی کمشنر جنرل شبیر احمد ڈوگر نے اس موقع پر کہا کہ ضلع انتظامیہ امن و امان کے قیام کے لیے پولیس کے ساتھ مکمل ہم آہنگی میں کام کر رہی ہے تحصیل سطح پر قائم امن کمیٹیوں کو فعال رکھا گیا ہے اور علمائے کرام سمیت تمام مکاتب فکر کے نمائندگان کو ساتھ لے کر چلنے کی پالیسی پر عمل کیا جا رہا ہے۔ انہوں نے کہا کہ باہمی اتحاد، برداشت اور قانون کی پاسداری کے ذریعے ہی ضلع میں دیرپا امن کو یقینی بنایا جا سکتا ہے اور ضلعی انتظامیہ اس مقصد کے لیے اپنی کوششیں جاری رکھے گی۔