لیہ(نمائندہ لیہ ٹی وی) ڈپٹی کمشنر آصف علی ڈوگر کی ہدایت پر ون ڈے ون تحصیل مہم پر عملدرآمد جاری ہے۔ اس سلسلہ میں تحصیل کروڑ لعل عیسن میں ایک دن ایک تحصیل مہم کے تحت متعلقہ محکموں کی طرف سے اقدامات اٹھائے گئے اور سروسز کے معیار کو مزید بہتر بنایا گیا۔ اس سلسلہ میں اسسٹنٹ کمشنر کروڑ لعل عیسن اصغرعلی نے فیلڈ میں ون ڈے ون تحصیل مہم کی آپریشنل سرگرمیوں کی نگرانی کی اور مختلف شعبوں کی کارکردگی کا جائزہ لیا۔اس موقع پر انہوں نے ستھرا پنجاب ٹیموں کی کارکردگی کو سراہا اور صفائی ستھرائی کے عمل کو مزید بہتر بنانے کی ہدایت کی۔اسسٹنٹ کمشنر نے کہا کہ ضلعی انتظامیہ کی اولین ترجیح شہریوں کو صاف ستھرا اور صحت مند ماحول فراہم کرنا ہے۔ انہوں نے کہا کہ بجلی کی جھولتی تاروں کی درستی، مین ہولز کے ڈھکن کی تبدیلی، پارکوں، سٹریٹ لائٹس کی بحالی، قیمتوں کی پڑتال یقینی بنائی جائے گی۔
