لیہ(نمائندہ لیہ ٹی وی) ڈپٹی کمشنر لیہ آصف علی ڈوگر نے ضلع بھر میں انسانی جانوں کے تحفظ اور عوامی سلامتی کو یقینی بنانے کے لیے رہائشی، تجارتی اور عوامی مقامات پر کھلے گڑھے، حوض، خندقیں یا نشیبی جگہیں کھودنے اور انہیں بغیر حفاظتی اقدامات کے چھوڑنے پر دفعہ 144 کے تحت پابندی عائد کر دی ہے۔ ڈپٹی کمشنر کے دفتر سے جاری ہونے والے حکم نامے میں بتایا گیا ہے کہ کھلے گڑھوں، حوضوں اور نشیبی مقامات میں پانی جمع ہونے سے مچھروں کی افزائش کے علاوہ حالیہ دنوں میں ایسے ہی پانی میں ڈوب کر دو بچوں کی ہلاکت کے واقعات بھی پیش آئے، جس کے باعث فوری اقدامات ناگزیر ہو گئے ہیں۔ حکم نامہ میں ہدایت کی گئی ہے کہ تمام مالکان، کرایہ دار اور ذمہ دار افراد اپنے علاقوں میں / گھروں کے باہر موجود کھلے گڑھے، حوض، خندقیں اور پانی جمع ہونے والی جگہوں کو فوری طور پر بھرنے، ڈھانپنے یا نکاسی آب کا بندوبست کرنے کے پابند ہوں گے۔ احکامات کی خلاف ورزی کرنے والوں کے خلاف تعزیرات پاکستان کی متعلقہ دفعات کے تحت مقدمات درج کیے جائیں گے اور قانونی کارروائی عمل میں لائی جائے گی۔
