لیہ(نمائندہ لیہ ٹی وی) ڈپٹی کمشنر آصف علی ڈوگر نے کہا ہے کہ رمضان المبارک میں عوام کو مثالی سہولیات فراہم کریں گے۔ انہوں نے یہ بات کمیٹی روم میں رمضان انتظامات کے جائزہ اجلاس کی صدارت کرتے ہوئے کہی۔ اجلاس میں ایڈیشنل ڈپٹی کمشنرز شاہد ملک، شبیر احمد ڈوگر، اسسٹنٹ کمشنر لیہ زوہیب کریم، ایس ڈی ای او پیرا ام حبیبہ اور متعلقہ افسران موجود تھے جبکہ اسسٹنٹ کمشنر کروڑ لعل عیسن اصغر علی اور اسسٹنٹ کمشنر چوبارہ ندیم ارشد نے ویڈیو لنک کے ذریعے شرکت کی۔ ڈپٹی کمشنر نے ہدایت کی کہ وزیر اعلیٰ پنجاب رمضان نگہبان کارڈ گھر گھر پہنچانے، ایکٹیویٹ کرنے اور رقوم کی ادائیگی کو رمضان کے پہلے عشرے تک یقینی بنایا جائے۔ ڈپٹی کمشنر نے کہا کہ مساجد اور امام بارگاہوں کی صفائی ستھرائی اور لائٹنگ کا مناسب بندوبست کیا جائے جبکہ رمضان بازار، سہولت بازار اور سہولت آن دا گو بازار رمضان المبارک سے قبل آپریشنل کر دئے جائیں۔ ڈپٹی کمشنر نے ہدایت کی کہ رمضان دستر خوان مریم کے مہمان کے لئے موزوں مقامات پر افطار کے بہترین انتظامات کئے جائیں۔ ڈپٹی کمشنر نے کہا کہ اشیاء خوردونوش کی نیلامی کے عمل سے مارکیٹ تک قیمتوں کی پڑتال کی جائے۔ مصنوعی مہنگائی اور ذخیرہ اندوزوں کے خلاف فوری کارروائی کی جائے۔ ڈپٹی کمشنر نے کہا کہ رمضان المبارک رحمتوں اور برکتوں کا مہینہ ہے۔ تمام متعلقہ ادارے اور افسران عوام کی حقیقی معنوں میں خدمت کر کے نیکیاں سمیٹیں اور اللّہ تعالیٰ کے ہاں سرخرو ہوں۔
