دہشت گردی سے قوم کو نہ ڈرایا جا سکتا ہے نہ تقسیم کیا جا سکتا ہے، ڈی سی لیہ، ضلعی امن کمیٹی اجلاس میں اسلام آباد سانحہ کی مذمت، لیہ میں مثالی مذہبی ہم آہنگی اور زیرو ٹالرینس پالیسی پر اتفاق

لیہ (نمائندہ لیہ ٹی وی) ڈپٹی کمشنر آصف علی ڈوگر کی زیر صدارت ضلعی امن کمیٹی کا اجلاس منعقد ہوا۔ اجلاس میں ڈسٹرکٹ پولیس آفیسر حسن جاوید، ایڈیشنل ڈپٹی کمشنر جنرل شبیر احمد ڈوگر، سید ثقلین زیدی، سید غوث گیلانی، سید علی رضا، سید نیئر کاظمی، طلحہ زبیر، علامہ ضیغم میرانی، ملک نصیر بھٹہ، فضل عباس و دیگر ممبران امن کمیٹی نے شرکت کی۔ اجلاس میں سانحہ اسلام آباد جامع مسجد خدیجہ الکبریٰ کے شہداء کے درجات کی بلندی کے لئے دعائے مغفرت کی گئی۔ اجلاس میں دہشت گردی کے حالیہ واقعہ کی مذمت کی گئی اور اسے انسانیت کے خلاف بزدلانہ کارروائی قرار دیا گیا۔ ڈپٹی کمشنر آصف علی ڈوگر نے اجلاس سے خطاب کرتے ہوئے کہا کہ دہشت گردوں کی ان بزدلانہ کارروائیوں سے قوم کو ڈرایا نہیں جا سکتا اور نہ ہی تفرقہ پیدا کیا جا سکتا ہے۔ انہوں نے کہا کہ ضلع لیہ میں مذہبی ہم آہنگی ہے اور یہاں کا امن مثالی ہے۔ انہوں نے کہا کہ ہم اپنے اتحاد اور بھائی چارے کی فضاء سے شر پسند عناصر کو شکست دیں گے اور اس مثالی امن کو برقرار رکھیں گے۔ ڈسٹرکٹ پولیس آفیسر حسن جاوید نے اجلاس سے خطاب کرتے ہوئے کہا کہ ضلع پولیس چوکس ہے اور امن کے قیام کے لئے کوئی دقیقہ فروگزاشت نہیں چھوڑا جائے گا۔ انہوں نے کہا کہ دہشت گردی، شر پسندی کے خلاف زیرو ٹالرینس پالیسی ہے اور اس پر بغیر کسی ہچکچاہٹ کے عملدرآمد کیا جائے گا۔ ممبران امن کمیٹی نے اس موقع پر مختلف تجاویز پیش کیں جنہیں سراہا گیا۔