لیہ کا رہائشی نوجوان اسلام آباد دھماکے میں شہید، بستی مورانی کروڑ کے مولانا محمد امین حیدری کے فرزند عباس مہدی زخموں کی تاب نہ لاتے ہوئے جاں بحق

لیہ (نمائندہ لیہ ٹی وی) تحصیل کروڑ ضلع لیہ کی بستی مورانی سے تعلق رکھنے والے نوجوان عباس مہدی اسلام آباد میں ہونے والے دھماکے میں زخمی ہونے کے بعد زخموں کی تاب نہ لاتے ہوئے شہادت کے رتبے پر فائز ہو گئے۔ عباس مہدی، معروف عالمِ دین مولانا محمد امین حیدری مورانی کے صاحبزادے تھے۔ذرائع کے مطابق عباس مہدی گزشتہ روز اسلام آباد میں ہونے والے دھماکے کے نتیجے میں شدید زخمی ہو گئے تھے، جنہیں فوری طور پر ہسپتال منتقل کیا گیا تاہم وہ جانبر نہ ہو سکے اور آج دم توڑ گئے۔ ان کی شہادت کی خبر ضلع لیہ پہنچتے ہی فضا سوگوار ہو گئی جبکہ اہلِ علاقہ، دینی و سماجی حلقوں میں گہرے رنج و غم کا اظہار کیا جا رہا ہے۔مرحوم کی شہادت پر سیاسی، مذہبی اور سماجی شخصیات نے دکھ اور افسوس کا اظہار کرتے ہوئے سوگوار خاندان سے تعزیت کی اور شہید کے درجات کی بلندی اور لواحقین کے لیے صبرِ جمیل کی دعا کی۔