لیہ: یومِ یکجہتی کشمیر، سپورٹس ڈیپارٹمنٹ کے زیر اہتمام مختلف کھیلوں کے مقابلے، ڈسٹرکٹ اسپورٹس کمپلیکس میں گرلز فٹبال و ہاکی میچز، اے ڈی سی جنرل شبیر احمد ڈوگر مہمان خصوصی

لیہ( نمائندہ لیہ ٹی وی) یوم یکجہتی کشمیر کے موقع پر سپورٹس ڈیپارٹمنٹ لیہ کے زیر اہتمام فٹبال، ہاکی اور بیڈ منٹن کے میچ کھیلے گئے۔ ڈسٹرکٹ سپورٹس کمپلیکس میں گرلز فٹبال اور ہاکی کے میچ منعقد ہوئے۔ میچوں کے مہمان خصوصی ایڈیشنل ڈپٹی کمشنر جنرل شبیر احمد ڈوگر تھے۔ اس موقع پر ڈسٹرکٹ سپورٹس آفیسر امتیاز احمد بھٹی و دیگر بھی موجود تھے۔ ایڈیشنل ڈپٹی کمشنر جنرل سے ٹیموں کا تعارف کروایا گیا۔ اے ڈی سی جی نے اس موقع پر گفتگو کرتے ہوئے کہا کہ کشمیریوں کے حق خود ارادیت کے لئے ہر پاکستانی ان کے ساتھ کھڑا ہے۔ انہوں نے کہا کہ کشمیر میں ڈھائے جانے والے مظالم کسی سے ڈھکے چھپے نہیں اور ان کو اجاگر کرنے کے لئے ہر پلیٹ فارم استعمال کیا جائے گا تاکہ اقوام عالم کی قردادوں پر عملدرآمد ہو سکے۔ ڈسٹرکٹ سپورٹس آفیسر امتیاز احمد بھٹی نے بتایا کہ یوم یکجہتی کشمیر کے سلسلہ میں چوک اعظم اور تحصیل کروڑ لعل عیسن میں بھی فٹبال اور بیڈ منٹن کے میچ کروائے جا رہے ہیں۔