لیہ میں بیوٹیفیکیشن پلان حتمی مراحل میں داخل، ڈپٹی کمشنر کی شہر میں صفائی و تجاوزات کے خاتمے کی ہدایت ڈپٹی کمشنر آصف علی ڈوگر نے اسلم موڑ سے ریلوے پھاٹک تک صفائی کا عمل شفٹوں میں جاری رکھنے، بے ہنگم پارکنگ اور عارضی تجاوزات کے خاتمے، ٹریفک کی روانی اور یکساں سائن بورڈز کی تنصیب سمیت بیوٹیفیکیشن پلان ماہ فروری تک مکمل کرنے کی ہدایت کر دی۔

لیہ(نمائندہ لیہ ٹی وی) وزیر اعلیٰ پنجاب مریم نواز شریف کے وژن کے مطابق ضلع لیہ میں بیوٹیفیکیشن پلان حتمی مراحل میں داخل ہو گیا ہے۔ ڈپٹی کمشنر آصف علی ڈوگر نے اس سلسلہ میں گزشتہ شام اسلم موڑ، صدر بازار چوبارہ روڈ اور لیہ مائنر پل پر قائم ماڈل ریڑھی بازار کا دورہ کیا۔ ایڈیشنل ڈپٹی کمشنر جنرل شبیر احمد ڈوگر بھی ان کے ہمراہ تھے۔ ڈپٹی کمشنر آصف علی ڈوگر نے ہدایت کی کہ اسلم موڑ تا ریلوے پھاٹک صفائی ستھرائی کے عمل کو شفٹوں میں انجام دیا جائے۔ عارضی تجاوزات اور بے ہنگم پارکنگ کی کوئی گنجائش نہیں۔ ٹریفک کی روانی کے لئے ٹریفک پولیس مستعدی سے خدمات انجام دیں۔ ڈپٹی کمشنر نے کہا کہ بیوٹیفیکیشن پلان سے نہ صرف شہر کی خوبصورتی میں اضافہ ہو گا بلکہ خریداری میں بھی آسانی ہو گی۔ انہوں نے کہا کہ لیہ مائنر پل سے اسلم موڑ تک یکساں طرز کے خوبصورت سائن بورڈ لگوائے جائیں تاکہ مارکیٹ جازب نظر لگے۔ انہوں نے ہدایت کی کہ بیوٹیفیکیشن پلان پر تیزی سے عمل کیا جائے اور ماہ فروری تک اسے مکمل کر لیا جائے۔ ڈپٹی کمشنر نے بعد ازاں لیہ مائنر پل پر قائم ماڈل ریڑھی بازار کا بھی معائنہ کیا اور اشیاء کی کوالٹی اور قیمتوں کی پڑتال کی۔