گورنمنٹ ایم سی ہائی سکول میں یومِ قائد اعظم کی شاندار تقریب، ڈپٹی کمشنر آصف علی ڈوگر مہمانِ خصوصی ڈپٹی کمشنر کا طلبہ سے خطاب ، قائد اعظم کے نظریات، اتحاد، ایمان اور نظم و ضبط کو عملی زندگی کا حصہ بنانے پر زور — طلبہ کی تقاریر، ملی نغمے اور ٹیبلو پیش

لیہ(نمائندہ لیہ ٹی وی )قائد اعظم ڈے کے حوالے سے گورنمنٹ ایم سی ہائی سکول میں ایک شاندار اور پروقار تقریب منعقد ہوئی تقریب کے مہمانِ خصوصی ڈپٹی کمشنر آصف علی ڈوگر تھے۔ اس موقع پر ایڈیشنل ڈپٹی کمشنر جنرل شبیر احمد ڈوگر ،سی ای او تعلیم ڈاکٹر عبد القیوم،ڈی ای او گل شیر،طلبہ، اساتذہ اور مختلف محکمہ جات کے افسران نے شرکت کی۔تقریب کا آغاز پرچم کشائی،تلاوت،نعت سے کیاگیا۔تقریب سے خطاب کرتے ہوئے ڈپٹی کمشنر آصف علی ڈوگر نے کہا کہ قائد اعظم محمد علی جناح کی زندگی جدوجہد اور اصول آج بھی ہمارے لیے روشن مثال ہیں۔ انہوں نے کہا کہ قائد اعظم کی تعلیمات ہمیں اتحاد، ایمان اور نظم و ضبط کا درس دیتی ہیں اور انہی اصولوں پر عمل پیرا ہو کر ہم پاکستان کو ترقی کی راہ پر گامزن کر سکتے ہیں۔انہوں نے کہا کہ قائد اعظم کے فرمان "کام، کام اور صرف کام” کو مثال بناتے ہوئے اگر آج ہم اپنی ذمہ داریاں بہتر طریقے سے نبھائیں گے تو کل یہی طلبہ اس ملک و قوم کی خدمت زیادہ بہتر انداز میں کر سکیں گے۔ انہوں نے کہا کہ طلبہ اپنی تعلیم، کردار اور ذمہ داری کو سنجیدگی سے لیں، کیونکہ وہی مستقبل کے معمار ہیں۔ڈپٹی کمشنر نے سی ای او ایجوکیشن اور ڈی ڈی کالجز کو ہدایات دیتے ہوئے کہا کہ وہ اپنے اپنے اداروں میں قائد اعظم کے حوالے سے خصوصی نشستیں منعقد کریں جن میں طلبہ تقاریر کریں، کوئز مقابلے ہوں اور نوجوان نسل کو قائد اعظم کی جدوجہد سے روشناس کرایا جائے۔ انہوں نے کہا کہ قائد اعظم کو صرف ان کی سالگرہ کے موقع پر یاد نہ رکھیں بلکہ ان کی فکر اور مشن کو عملی زندگی کا حصہ بنایا جائے۔تقریب کے آخر میں طلبہ و طالبات نے قائد اعظم کی جدوجہد اور تحریکِ پاکستان کے موضوع پر شاندار تقاریر پیش کیں۔ اس کے علاوہ مختلف ٹیبلو اور ملی نغموں کے ذریعے بھی طلبہ نے قائد اعظم سے اپنی عقیدت اور محبت کا اظہار کیا جس پر ڈپٹی کمشنر و شرکاء نے بھرپور داد دی ۔