ضلع لیہ میں خسرہ اور روبیلا سے بچاؤ کی 12 روزہ مہم 17 نومبر سے شروع ہوگی، ایڈیشنل ڈپٹی کمشنر جنرل شبیر احمد ڈوگر کی زیر صدارت اجلاس — 170 ٹیمیں مہم میں حصہ لیں گی، والدین و اساتذہ سے بھرپور تعاون کی اپیل

لیہ(نمائندہ لیہ ٹی وی)بچوں میں پیدائشی چھوٹا سر، اندھا، بہرہ پن( روبیلا) اور جان لیوا خسرہ کے تدارک کے لئے مہم شروع کرنے کا فیصلہ۔ 6 ماہ سے 5 سال تک کی عمر کے بچوں کو ان اچھوت اور موذی بیماریوں سے بچاؤ کی ویکسین کی جائے گی۔ روبیلا اور خسرہ سے بچاؤ کی 12 روزہ مہم 17 نومبر کو شروع ہوگی۔ اس بات کا فیصلہ ایڈیشنل ڈپٹی کمشنر جنرل شبیر احمد ڈوگر کی زیر صدارت مہم کے انتظامات کے جائزہ اجلاس میں کیا گیا۔ اجلاس میں چیف ایگزیکٹو آفیسر ہیلتھ ڈاکٹر شاہد ریاض،ڈاکٹر سید عمار حسین شاہ ڈویژنل ای پی آ ئ آفیسر ڈبلیو ایچ او ، ڈاکٹر مزمل کریم، ڈپٹی ڈائریکٹر لوکل گورنمنٹ احسان احمد، ڈاکٹر نبیل احمد، ڈاکٹر یونس کلیہ، زراعت افیسر راشد علی، ڈاکٹر مزمل کریم، ڈسٹرکٹ پاپولیشن آفیسر ظفر اقبال، ڈسٹرکٹ ایجوکیشن آفیسر گل شیر، ڈاکٹر نعیم الحسن، ڈاکٹر ساجد حسین، فوکل پرسن ای پی آئی علی احمد نے شرکت کی۔ اجلاس میں بتایا گیا کہ خسرہ اور روبیلا انتہائی جان لیوا، موذی اور چھوت والے امراض ہیں جن سے معصوم بچوں کی زندگیوں کو خطرہ لاحق رہتا ہے۔ اجلاس میں بتایا گیا کہ مہم کے دوران 170 ٹیمیں حصہ لیں گی اور چھ ماہ سے پانچ سال تک کی عمر کے بچوں کو روبیلا اور خسرہ سے بچاؤ کی ویکسین کی جائے گی۔ ایڈیشنل ڈپٹی کمشنر جنرل شبیر احمد ڈوگر نے جلا سے خطاب کرتے ہوئے کہا کہ بچوں کی زندگی کو بچانے کے لیے اور مہم کو کامیاب بنانے کے لیے ہر ممکن اقدامات اٹھائے جائیں۔ انہوں نے کہا کہ والدین اساتذہ اور سول سوسائٹی اس مہم کو کامیاب بنانے میں اپنا کردار ادا کرے۔ اے ڈی سی جی نے ہدایت کی کہ اس سلسلے میں زیادہ سے زیادہ آگاہی عوام تک پہنچائی جائے تاکہ ان کے بچوں کو خسرہ اور روبیلا جیسے امراض سے محفوظ رکھا جا سکے۔