لیہ(نمائندہ لیہ ٹی وی) وزیر اعلیٰ پنجاب مریم نواز شریف نے پولیو فری پنجاب کا ٹارگٹ مقرر کیا ہے۔ انسداد پولیو مہم کی کڑی مانیٹرنگ کی جا رہی ہے۔ پنجاب کے بچوں کو پولیو جیسے موذی مرض سے بچانے کے لئے بین الصوبائی ٹرانزٹ پوائنٹس پر بھی کڑی نگرانی کی جا رہی ہے۔ ضلع لیہ کے عوام خوش قسمت ہیں کہ ان کے بچے پولیو سے محفوظ ہیں۔ لیہ کی ضلعی انتظامیہ، محکمہ صحت کی ٹیمیں اور پولیو ورکرز ضلع کو پولیو فری رکھنے پر مبارکباد اور شاباش کے مستحق ہیں۔ یہ بات وزیر اعلیٰ پنجاب کی فوکل پرسن برائے انسداد پولیو مہم عظمیٰ کاردار نے ڈی سی آفس کمیٹی روم میں میڈیا ٹاک کرتے ہوئے کہی۔ اس موقع پر ڈپٹی کمشنر امیرا بیدار، اے ڈی سی آر شاہد ملک، اسسٹنٹ کمشنر حارث حمید خان، چیف ایگزیکٹو آفیسر ہیلتھ ڈاکٹر شاہد ریاض موجود تھے۔ فوکل پرسن وزیر اعلیٰ پنجاب عظمیٰ کاردار نے کہا کہ ضلع لاہور میں نومبر میں پائلٹ پراجیکٹ کے طور پر خصوصی انسداد پولیو مہم شروع کی جائے گی جس میں 15 سال کے لڑکے لڑکیوں کو پولیو کے خلاف مدافعتی ویکسین دی جائے گی اور یہ سلسلہ بتدریج پورے پنجاب تک بڑھایا جائے گا۔ عظمیٰ کاردار نے کہا کہ رواں سال پنجاب میں پولیو کا صرف ایک کیس رپورٹ ہوا ہے جس میں بچے کی عمر 8 سال بتائی گئی ہے جس کے بعد 15 سال کے بچوں کو پولیو ویکسین پلانے کا فیصلہ کیا گیا ہے۔ انہوں نے کہا کہ کسی بھی عوامی آگہی مہم میں میڈیا کا کردار بہت اہمیت کا حامل ہوتا ہے اور حکومت پنجاب کی طرف سے بچوں کی بہتر نشو نما اور صحت مند زندگی کیلئے شروع کی جانے والی مہم میں میڈیا اپنا بہترین کردار ادا کرے۔
