تحصیل ہیڈ کوارٹر نواز شریف ہسپتال لیہ میں مالی بے ضابطگیاں، ایم ایس کو وارننگ، دو افسران کی خدمات سرنڈرٹھیکیدار سے گفٹ لینے کے الزام پر محکمہ صحت پنجاب کی کارروائی، انکوائری رپورٹ میں مالی و انتظامی خلاف ورزیوں کی نشاندہی

لیہ (نمائندہ لیہ ٹی وی) تحصیل ہیڈ کوارٹر میاں نواز شریف ہسپتال لیہ میں مالی اور انتظامی بے ضابطگیوں کے الزامات پر محکمہ صحت پنجاب نے کارروائی کرتے ہوئے ایم ایس کو وارننگ جاری کر دی جبکہ دو افسران کی خدمات سرنڈر کر دی گئیں۔تفصیلات کے مطابق ہسپتال کے ٹھیکیدار محمد آصف نے سیکرٹری صحت پنجاب کو دی گئی درخواست میں الزام عائد کیا تھا کہ 9 لاکھ روپے کے بقایا جات کی ادائیگی میں تاخیر پر ایم ایس تحصیل ہیڈ کوارٹر ہسپتال کے موبائل فون پر مختلف اوقات میں 50 ہزار روپے ٹرانسفر کیے گئے۔ شکایت پر سیکرٹری صحت پنجاب نے ڈائریکٹر ہیلتھ سروسز بہاولپور کو انکوائری آفیسر مقرر کرتے ہوئے رپورٹ طلب کی۔انکوائری آفیسر نے ایم ایس، پروکیورمنٹ آفیسر اور اسسٹنٹ ایڈمن آفیسر کو طلب کیا، تاہم درخواست دہندہ دو بار طلبی کے باوجود پیش نہ ہوا۔ انکوائری مکمل ہونے پر رپورٹ میں قرار دیا گیا کہ ہسپتال انتظامیہ نے مالیاتی اور انتظامی ضوابط کو نظرانداز کیا اور پرچیز پراسس قانونی تقاضے پورے کیے بغیر مکمل کیا گیا، جس سے نگرانی کے عمل میں شدید فقدان ظاہر ہوتا ہے۔رپورٹ کی بنیاد پر محکمہ صحت پنجاب نے ایم ایس کو ریٹائرمنٹ کے قریب ہونے کے باعث وارننگ جاری کی، جب کہ پروکیورمنٹ آفیسر محمد اویس اور اسسٹنٹ ایڈمن آفیسر محمد باسط کی خدمات سرنڈر کر دی گئیں۔گزشتہ روز ڈپٹی کمشنر لیہ امیرا بیدار نے اس حوالے سے پوچھے گئے سوال کے جواب میں کہا کہ کسی کو فرائض سے تجاوز کی اجازت نہیں، شکایات کی صورت میں قانونی تقاضوں کے مطابق کارروائی عمل میں لائی جاتی ہے، لہٰذا تمام افسران اور عملہ احساسِ ذمہ داری کے ساتھ فرائض انجام دیں۔