وزیراعلیٰ پنجاب کا بڑا تعلیمی قدم: لیہ کے 798 اسکولوں میں سی ایم نیوٹریشن پروگرام کا آغاز،99 ہزار سے زائد طلبہ کو دودھ اور بسکٹ فراہم کیے جائیں گے، خالی پیک کی ری سائیکلنگ سے حاصل آمدن متعلقہ اسکول پر خرچ ہوگی

لیہ(نمائندہ لیہ ٹی وی)وزیراعلی پنجاب مریم نواز شریف کے سکول میل پروگرام کے لئے ضلع لیہ کے 798 سکول منتخب۔ منتخب سکولوں میں زیر تعلیم 99 ہزار سے زائد طلبہ کو سی ایم سکول نیوٹریشن پروگرام شروع کے تحت دودھ اور بسکٹ فراہم کیے جائیں گے۔ یہ بات ڈپٹی کمشنر امیرابیدار کی زیرصدارت سکول ایجوکیشن اتھارٹی کے جائزہ اجلاس میں بتائی گئی۔اجلاس میں ایڈیشنل ڈپٹی کمشنرجنرل شبیر احمدڈوگر،اسسٹنٹ کمشنر حارث حمیدخان،سی ای او تعلیم ڈاکٹرعبدالقیوم ،ڈی ای او گل شیر، زونل منیجر فوجی فوڈزفرقان علی ، ڈسٹرکٹ منیجر محمدذیشان ودیگر موجودتھے۔ ڈپٹی کمشنر امیرابیدارنے اجلاس سے خطاب کرتے ہوئے کہاکہ وزیراعلی پنجاب مریم نوازشریف سرکاری سکولوں کے طلبہ کی تعلیم اور فلاح و بہبود کے لیے قابلِ ستائش اقدامات اُٹھا رہی ہیں۔ مفت داخلہ، مفت کتابیں، مفت یونیفارم اور دیگر سہولیات کی فراہمی اُن کے ویژن کا حصہ ہیں تاکہ بچوں کو معیاری تعلیم اور بہتر مواقع میسر آئیں۔انہوں نے کہاکہ وزیراعلی کی ہدایت پرضلع لیہ میںسی ایم سکول نیوٹریشن پروگرام شروع کیاجارہا ہے جس سے ضلع لیہ کے طلبہ بھی مستفیدہوں گے ۔ڈپٹی کمشنر نے کہاکہ طلبہ کو غذائیت سے بھرپور دودھ کا پیک دیاجائے گا بچے دودھ کا خالی پیک سکول میں جمع کرائیں گےخالی رئیپرز کی ری سائیکلنگ سے ہونے والی آمدن متعلقہ سکول پر ہی خرچ کی جائے گی۔ڈپٹی کمشنر نے مزید کہا کہ یہ پروگرام نہ صرف بچوں کی جسمانی نشوونما اور ذہنی صلاحیتوں کو بہتر بنائے گا بلکہ اُن میں صحت مند سرگرمیوں کا رجحان بھی پیدا کرےگا۔