لیہ(نمائندہ لیہ ٹی وی)وائس چانسلر یونیورسٹی آف لیہ پروفیسر ڈاکٹر محمد زبیر ابوبکر نے 20 روزہ فیکلٹی ٹریننگ ورکشاپ کا افتتاح کر دیا۔ ٹریننگ ورکشاپ نیشنل اکیڈمی آف ہائر ایجوکیشن کے نیشنل آوٹ ریچ پروگرام برائے فیکلٹی کے تحت منعقد ہو رہی ہے۔ ٹریننگ ورکشاپ میں یونیورسٹی آف لیہ اور یونیورسٹی آف میانوالی کے فیکلٹی ممبران کو تدریس کے جدید تقاضوں اور طریقوں بارے ٹریننگ دی جائے گی۔ اس موقع پر ٹریننگ ورکشاپ میں یونیورسٹی آف سائنس اینڈ ٹیکنالوجی بنوں سے ماسٹر ٹرینر ہائر ایجوکیشن ڈاکٹر زبیر خان، رجسٹرار ڈاکٹر اظہر عباس، یونیورسٹی آف لیہ اور یونیورسٹی آف میانوالی کے فیکلٹی ممبران موجود تھے۔ وائس چانسلر یونیورسٹی آف لیہ پروفیسر ڈاکٹر محمد زبیر ابوبکر نے افتتاحی سیشن سے خطاب کرتے ہوئے کہا کہ حکومت پنجاب کوالٹی ایجوکیشن کے لئے کوشاں ہے ایک بہترین اور قابل ریسرچر اور معلم کے لئے تدریس کے جدید تقاضوں اور طریقوں سے واقف ہونا بہت ضروری ہے۔ طلبہ کو مشکل لیکچر آسان، دلچسپ پر اثر انداز میں پیش کرنے کے لئے جدید تدریسی تکنیک ناگزیر ہے۔ وائس چانسلر نے کہا کہ لیہ ایک ابھرتا ہوا علاقہ ہے جہاں کا لٹریسی ریٹ اور یہاں کے طلبہ ٹیلنٹ میں کسی سے کم نہیں۔ طلبہ کی بہترین علمی آبیاری کے لئے ہائر ایجوکیشن کمیشن کی مذکورہ ورکشاپ انتہائی سود مند ثابت ہوگی۔ انہوں نے مزید کہا کہ موجودہ حالات میں ٹریننگ ورکشاپ کا انعقاد اس بات کا ثبوت ہے کہ ہم نے تعلیم کے میدان میں محنت کر کے ہی کامیابی حاصل کرنی ہے۔ ورکشاپ سے ماسٹر ٹرینر ایچ ای سی ڈاکٹر زبیر خان نے خطاب کرتے ہوئے کہا کہ دنیا بھر میں اساتذہ کی استعداد کار میں اضافہ کے ٹریننگ ورکشاپ کا انعقاد کیا جاتا ہے اور یہ خوش آئند امر ہے کہ ایچ ای سی کے زیر اہتمام لیہ اور میانوالی کے فیکلٹی ممبران کو ٹریننگ دی جا رہی ہے۔ رجسٹرار یونیورسٹی آف لیہ اظہر عباس نے ورکشاپ سے خطاب میں کہا کہ اساتذہ طلبہ کے رول ماڈل ہوتے ہیں اور اس ٹریننگ ورکشاپ سے اساتذہ کی صلاحیتوں میں نکھار آئے گا۔ ٹریننگ ورکشاپ کے افتتاحی سیشن میں کوآرڈینیٹر ورکشاپ ڈاکٹر ذیشان حسن نے مہمانوں کو خوش آمدید کہا اور ورکشاپ کی غرض و غایت بارے بتایا۔ تقریب کے نظامت کے فرائض ڈاکٹر حسن رضا زیدی نے انجام دئے۔ بعد ازاں وائس چانسلر یونیورسٹی آف لیہ پروفیسر ڈاکٹر محمد زبیر ابوبکر کے ہمراہ مہمانوں اور فیکلٹی ممبران کا گروپ فوٹو بنایا گیا
