دھی رانی پروگرام: لیہ میں 104 خوش نصیب جوڑے 28 اپریل کو شادی کے بندھن میں بندھیں گے

لیہ (نمائندہ لیہ ٹی وی)وزیر اعلیٰ پنجاب مریم نواز شریف کے دھی رانی پروگرام کے دوسرے مرحلے کے تحت ضلع لیہ میں 104 خوش نصیب جوڑوں کو شادی کے بندھن میں بندھنے جا رہے ہیں۔اجتماعی شادی کی تقریب میں دو خوشنصیب مسیحی جوڑے بھی شامل ہوں گے ۔ ہر جوڑے کو وزیر اعلیٰ پنجاب مریم نواز شریف کی طرف سے 1 لاکھ روپے سلامی اور 2 لاکھ روپے مالیت کا سامان مہیا کیا جائے گا۔ دھی رانی کے تحت اجتماعی شادی کی تقریب 28 اپریل کو مقامی مارکی میں منعقد ہوگی۔یہ بات ایڈیشنل ڈپٹی کمشنر ریونیومحمدشاہدملک کی زیرصدارت میں منعقدہ اجلاس کے دوران بریفنگ میں بتائی گئی۔ اجلاس میںاسسٹنٹ کمشنرزحارث حمیدخان،نور محمد،ڈپٹی ڈائریکٹر سوشل ویلفیئر صائمہ سیماب،ڈپٹی ڈائریکٹرلوکل گورنمنٹ عبدالصمد،ڈپٹی ڈائریکٹرانفارمیشن نثار احمدخان ،انچارج سیکورٹی برانچ محمد طارق ،سول ڈیفنس آفیسرمحمدتوقیراور متعلقہ افسران موجود تھے۔ اس موقع پر ڈپٹی ڈائریکٹر سوشل ویلفیئر صائمہ سیماب نے بریفنگ دیتے ہوئے بتایاکہ سابقہ روایت کی طرح شادی تقریب کے بہترین انتظامات کیے جائیں گے دلہاکی طرف سے نو اور دلہن کی طرف سے بھی نو مہمانوں کو شادی کی دعوت دی گئی ہے تمام مہمانوں کے لیے بہترین ون ڈش کھانے کابھی انتظام کیاجائے گاجبکہ مہمانوں کے آنے جانے کے لیے فری ٹرانسپورٹ کا بھی اہتمام کیا جائے گا۔اے ڈی سی آر نے اجلاس سے خطاب کرتے ہوئے کہا حکومت پنجاب کا دھی رانی پروگرام غریب اور ضرورت مند جوڑوں کی مدد کرنے کا ایک شاندار اقدام بھی ہے جو نہ صرف ان خوش نصیب جوڑوں کی زندگیوں میں خوشیاں لائے گا بلکہ اس سے معاشرتی ہم آہنگی اور بھائی چارے کو بھی فروغ ملے گا۔انہوں نے تقریب میں بہترین اقدامات کرنے کی ہدایت کی۔