لیہ(نمائندہ لیہ ٹی وی)کمشنر ڈیرہ غازی خان ڈویژن اشفاق احمد نے کہا ہے کہ عوامی فلاح وبہبود کی جاری ترقیاتی سکیموں کو اعلی معیارکے ساتھ 30جون سے قبل مکمل کرلیاجائے ۔نئی سکیموں کے ٹینڈرپراسیس میں تیزی لائی جائے اور جن سکیموں کے فنڈز ریلیز ہوگئے ہیں ان پرکام شروع کیاجائے ۔انہوں نے یہ بات ڈی سی کمیٹی روم میں وزیر اعلیٰ پنجاب انیشیٹوز اور ترقیاتی منصوبوں کے جائزہ اجلاس کی صدارت کرتے ہوئے کہی۔ اجلاس میںڈپٹی کمشنر امیرابیدار، ایڈیشنل ڈپٹی کمشنرزمحمد شاہد ملک، شبیر احمد ڈوگر ،اسسٹنٹ کمشنرز نور احمد،ثنا اللہ ہنجرا اور ضلعی محکموں کے سربراہان موجودتھے۔ کمشنر اشفاق احمد چوہدری نے اجلاس سے خطاب کرتے ہوئے کہاکہ ضلع میں تعمیرہونے والے 5ڈگری کالجز اور یونیورسٹی آف لیہ کے بقیہ کام کو فی الفور مکمل کرنے کے لیے ضروری اقدامات اُٹھائے جائیں اس سلسلہ میں کمشنر آفس سے رابطہ میں رہاجائے تاکہ ان منصوبوں کو جلدازجلدپایہ تکمیل تک پہنچایاجاسکے اور عوام ان کے ثمر ات سے مستفید ہوسکیں۔کمشنرنے کہاکہ شہریوں کوصحت کی بہترین سہولت فراہم کرنا اولین ترجیح ہے اس سلسلہ میں عطائی ڈاکٹروں کے خلاف کریک ڈاون کیا جائے ۔کمشنرنے مزید کہاکہ حکومت پنجاب شعبہ زراعت کی ترقی کے لیے گراں قدر خدمات اُٹھارہی ہے کپاس کی فصل کے ٹارگٹ کے اہداف کے حصول کے لیے محکمہ زراعت اپنی ذمہ داری بہترین طریقہ سے اد اکرے۔کمشنر ڈیرہ غازی خان ڈویژن اشفاق احمدنے کہاکہ مویشی پال حضرات کے قیمتی جانوروںکو منہ کھر کی بیماری سے محفوظ رکھنے کے لیے محکمہ لائیوسٹاک اپنی ذمہ داری بروقت ادا کریں ۔
