ملتان(نمائندہ لیہ ٹی وی)سیکرٹری زراعت پنجاب افتخار علی سہو نے کہا ہے کہ رواں سیزن کپاس کی اگیتی کاشت میں نمایاں اضافہ ہوا ہے۔ کپاس کی اگیتی کاشت کے لئے وزیر اعلیٰ پنجاب نے25 ہزار روپے کا خصوصی پیکج دیا۔ محکمہ زراعت پنجاب کے تحت اگیتی کپاس کی کاشت کے لئے6 ڈویژنز میں بروقت آگاہی مہم چلائی گئی جس کے نتیجہ میں کپاس کی اگیتی کاشت 8 لاکھ ایکڑ سے زائد رقبہ پر مکمل ہو ئی جو گزشتہ سال کے کاشتہ رقبہ سے دوگنا سے بھی زیادہ ہے۔ کپاس کی اگیتی کاشت کی مہم کے دوران دھان کی اگیتی کاشت کی حوصلہ شکنی سے بھی مثبت نتائج برآمد ہوئے۔اگیتی کپاس کاشت کرنے والے تمام کاشتکاروں کو رجسٹرڈ کرکے اُن کا پورا ریکارڈ مرتب کیا جا چکا ہے جس کی غیر جانبدارذرائع سے جیوگرافکل انفارمیشن سسٹم(GIS) کے ذریعے توثیق کرائی گئی ہے۔کپاس کی اگیتی کاشت کی مہم کے دوران محکمہ زراعت توسیع ونگ کے فیلڈ عملہ نے 2 لاکھ66 ہزار کاشتکاروں سے فرداً فرداً رابطہ کیا اور1 لاکھ80 ہزار کاشتکاروں کو رجسٹرڈ بھی کیا۔ان میں سے 1 لاکھ45 ہزار کاشتکار ایسے ہیں جنہوں نے عملی طور پر اگیتی کپاس کاشت کی۔سیکرٹری زراعت پنجاب نے کہا کہ کپاس کی اگیتی کاشت کے دوران صرف ٹرپل جین اقسام کی کاشت کرائی گئی۔ موجودہ موسمیاتی تبدیلیوں کے تناظر میں کلائمیٹ سمارٹ اقسام کی دریافت پر پیش رفت جاری ہے۔انھوں نے مزید کہا کہ کپاس کی کاشت کا دوسرا مرحلہ جاری ہے۔کپاس کی کاشت کیلئے فیلڈ فارمیشنز نے عملی سرگرمیاں تیز کر دی ہیں۔کپاس کی کاشت کے سلسلہ میں یہ سب سے اہم مرحلہ ہے جوکہ30 اپریل تک جاری رہے گی۔ کپاس کی کاشت کا تیسرا مرحلہ یکم تا25 مئی تک ہوگا۔
