لیہ(نمائندہ لیہ ٹی وی)عبدالشکور اینڈ کمپنی لیہ کا 45 لاکھ روپے مالیت کا تل کا لوڈ ٹرک فیکٹری پہنچنے سے پہلے غائب ہو گیا۔ اس حوالے سے تھانہ سٹی لیہ میں مقدمہ درج کر لیا گیا ہے۔ عبدالشکور اینڈ کمپنی کے مالک حافظ جمیل احمد خان کی مدعیت میں درج کی گئی ایف آئی آر کے مطابق، البرکت تل فیکٹری کھڑیانوالی، ضلع فیصل آباد، کو 325 گٹو، وزن 12850 کلوگرام، مالیتی 45 لاکھ روپے بھجوانے کے لیے الریاض گذر ٹرانسپورٹ کمپنی فتح پور روڈ چوک اعظم لیہ کے مالک مہر ریاض حسین کلاسرہ سے رابطہ کیا گیا۔ مہر ریاض نے ٹرک نمبری LES-1668 کے ڈرائیور محمد صدیق کو روانہ کیا، جس پر تل کے گٹو لوڈ کیے گئے اور شاہ الیکٹرانک کمپیوٹرائزڈ گرڈ اسٹیشن چوک اعظم روڈ لیہ سے وزن کرانے کے بعد رسید حاصل کی گئی۔ ڈرائیور کو 10 ہزار روپے پیشگی دیے گئے، جبکہ بقیہ کرایہ فیکٹری پہنچنے کے بعد وصول کرنا تھا۔ مقررہ وقت پر ٹرک فیکٹری نہ پہنچنے پر اڈے کے مالک مہر ریاض اور مہر زاہد سے رابطہ کیا گیا، جنہوں نے بتایا کہ وہ معاملے کی تحقیقات کر رہے ہیں۔ تاہم، تاحال کوئی معلومات فراہم نہیں کی گئی۔ ان کا کہنا ہے کہ ڈرائیور نے امانت میں خیانت کرتے ہوئے مال فیکٹری نہیں پہنچایا۔ پولیس نے حافظ جمیل احمد خان کی درخواست پر مقدمہ درج کر کے قانونی کارروائی کا آغاز کر دیا ہے۔
