اے این ایف کی ملک بھر میں منشیات کے خلاف کارروائیاں، 7 ملزمان گرفتار، 138 کلوگرام سے زائد منشیات برآمد

23 جنوری،لیہ ٹی وی: اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف کامیاب کارروائیاں کرتے ہوئے 7 ملزمان کو گرفتار کر لیا۔ ترجمان اے این ایف کے مطابق ان کارروائیوں کے دوران 138.63 کلوگرام سے زائد منشیات برآمد کی گئی ہے۔
شیخوپورہ میں ایک کار کی تلاشی کے دوران 1.2 کلو افیون اور 2.4 کلو چرس برآمد کر کے 3 ملزمان کو گرفتار کیا گیا۔ گرفتار ملزمان نے اعتراف کیا ہے کہ وہ تعلیمی اداروں کے طلباء کو منشیات فروخت کرتے تھے۔
لاہور میں کوریئر سروس کے ذریعے برطانیہ بھیجی جانے والی ایک بُک جیکٹ سے 429 نشہ آور گولیاں برآمد کی گئیں۔
کراچی میں ایک ٹرک سے 78 کلو چرس برآمد کی گئی، جس کے ساتھ ایک ملزم کو گرفتار کر لیا گیا۔
ترجمان کے مطابق بلوچستان کے علاقے پسنی میں چھپائی گئی 50 کلو چرس برآمد کی گئی، جبکہ اسلام آباد کے قریب ایک خاتون کے بیگ سے 3.6 کلو چرس اور کوئٹہ کے ایئرپورٹ روڈ پر مرد و خاتون سے 1.5 کلو آئس برآمد کی گئی۔
اے این ایف کے ترجمان نے کہا کہ یہ کارروائیاں منشیات اسمگلنگ کے خلاف فورس کے عزم کا منہ بولتا ثبوت ہیں اور آئندہ بھی ایسے عناصر کے خلاف سخت کارروائیاں جاری رہیں گی۔