23جنوری لیہ ٹی وی:سندھ حکومت کے محکمہ انکوائریز اینڈ اینٹی کرپشن اسٹیبلشمنٹ کے 50 ملازمین نے وفاقی تحقیقاتی ادارے (ایف آئی اے) سے وائٹ کالر کرائم کے حوالے سے تربیت مکمل کر لی ہے، جبکہ مزید اہلکاروں کا دوسرا گروپ تربیت کے لیے روانہ کر دیا گیا ہے۔
چیئرمین اینٹی کرپشن اسٹیبلشمنٹ ذوالفقار علی شاہ نے بتایا کہ محکمے میں جدید ری اسٹرکچرنگ کا عمل جاری ہے جس کا مقصد اہلکاروں کو نئے چیلنجز سے نمٹنے کے لیے تیار کرنا ہے۔ اس عمل کے تحت انفرااسٹرکچر کی تبدیلی کے ساتھ ساتھ محکمے کو ڈیجیٹلائزیشن کی طرف منتقل کیا جا رہا ہے تاکہ تمام کام آن لائن ہو سکیں۔
انہوں نے کہا کہ دوسرے مرحلے میں مارچ 2025 سے پولیس اکیڈمی میں ہر عہدے کے ملازمین کے لیے چھ ماہ کی جسمانی تربیت کا آغاز ہوگا، جس میں پہلے مرحلے میں اے ایس آئی سے انسپکٹر تک کے 200 ملازمین کو پولیس ٹریننگ کالج شہدادپور بھیجا جائے گا۔
ذوالفقار علی شاہ کے مطابق، اینٹی کرپشن محکمے کی تنظیمِ نو کے تحت ڈائریکٹر جنرل اینٹی کرپشن کا نیا سیٹ اپ نافذ کر دیا گیا ہے، اور فرسودہ نظام ختم کر کے تمام کاموں کو جدید آٹومیشن سسٹم کے تحت لایا جا رہا ہے۔
یہ اقدامات محکمہ اینٹی کرپشن کو مضبوط اور فعال بنانے کی جانب اہم قدم ثابت ہوں گے۔
جمعہ, دسمبر 5, 2025
