22 جنوری، لیہ ٹی وی: کرم کے علاقے بگن میں ضلعی انتظامیہ، پولیس اور سیکیورٹی اداروں کی مشترکہ کارروائی کے دوران 19 سے 21 جنوری تک جاری رہنے والے آپریشن میں بڑی تعداد میں غیرقانونی ہتھیار برآمد کر لیے گئے ہیں۔
ذرائع کے مطابق اس آپریشن میں مقامی عمائدین اور عوام نے بھرپور تعاون کرتے ہوئے اہم معلومات فراہم کیں، جس کی مدد سے جرائم پیشہ عناصر کے خلاف کامیابی حاصل ہوئی۔ حکام کا کہنا ہے کہ یہ کارروائی علاقے میں دیرپا امن کے قیام اور دہشت گردی کے خاتمے کی جانب ایک اہم پیش رفت ہے۔
سرکاری ذرائع نے تصدیق کی ہے کہ آج ممکنہ طور پر ایک قافلہ سامانِ رسد لے کر پاراچنار روانہ ہوگا۔ معاہدے کے مطابق شرپسندوں کے خلاف بلا تفریق کارروائی عمل میں لائی جائے گی۔
واضح رہے کہ چند دن قبل لوئر کرم کے علاقے بگن میں کھانے پینے کے سامان لے جانے والے قافلے پر حملے کے بعد حکام نے دہشت گردوں کے خلاف آپریشن کا فیصلہ کیا تھا۔ اس آپریشن کے ذریعے علاقے میں امن و امان کی بحالی کی کوششوں کو مزید تقویت ملی ہے۔
