لڈن میں جعلی دودھ تیار کرنے والا گروہ گرفتار، کیمیکل اور مشینری ضبط

22جنوری لیہ ٹی وی:پنجاب فوڈ اتھارٹی نے لڈن کے علاقے چاہ مولوی والا میں کامیاب کارروائی کرتے ہوئے کیمیکلز سے جعلی دودھ تیار کرنے والے گروہ کو گرفتار کر لیا۔ اتھارٹی کے مطابق چھاپے کے دوران 16 کلو کیمیکل، 3 کلو خشک پاؤڈر اور جعلی دودھ بنانے میں استعمال ہونے والی مشینری ضبط کر لی گئی ہے۔
ڈی جی پنجاب فوڈ اتھارٹی نے بتایا کہ ملزمان کے خلاف ایف آئی آر درج کر لی گئی ہے اور ان کے خلاف قانونی کارروائی جاری ہے۔
اس سے قبل پنجاب فوڈ اتھارٹی کی جانب سے ملتان ڈویژن میں بھی مختلف کارروائیاں کی گئیں، جن میں میٹ اینڈ پولٹری شاپس، ریسٹورنٹس، ڈرنک کارنرز، اور ہول سیل پوائنٹس کی انسپکشن کی گئی۔ حفظان صحت کے اصولوں کی خلاف ورزی پر متعدد کاروباروں پر بھاری جرمانے عائد کیے گئے۔
پنجاب فوڈ اتھارٹی عوام کی صحت اور معیارِ زندگی کو بہتر بنانے کے لیے غیرمعیاری اور مضر صحت اشیاء کے خلاف کارروائیاں جاری رکھے ہوئے ہے۔