22 جنوری، لیہ ٹی وی: وزیرِ اعظم شہباز شریف نے کہا ہے کہ چین میں زرعی تربیت حاصل کرنے والے پاکستانی طلباء کا پورا خرچ حکومت پاکستان اٹھائے گی۔ وزیرِ اعظم نے یہ اعلان چین جانے والے پاکستانی طالب علموں سے متعلق ایک جائزہ اجلاس کی صدارت کے دوران کیا۔
اجلاس میں وزیرِ اعظم نے زرعی شعبے میں تربیت کے لیے منتخب طلباء میں شفافیت اور میرٹ کو ترجیح دینے کی ہدایت کی۔ انہوں نے مزید کہا کہ پورٹل کے ذریعے درخواستوں کی اسکروٹنی کے دوران سلیکشن میں شکایات کے ازالے کے لیے ایک کمیٹی تشکیل دی جائے گی۔
وزیرِ اعظم نے کہا کہ چین پاکستان کا دیرینہ دوست ملک ہے اور اس کی زرعی ترقی بے مثال ہے۔ اپنے حالیہ دورے کے دوران انہوں نے چینی قیادت سے پاکستانی طلباء کے لیے زرعی شعبے میں جدید تربیت فراہم کرنے کی درخواست کی تھی، جس پر چین نے مثبت جواب دیا۔
شہباز شریف نے بتایا کہ اللّٰہ کے فضل سے بہت جلد چین کے لیے طلباء کا پہلا بیچ روانہ ہوگا تاکہ وہ زرعی شعبے میں جدید تربیت حاصل کر سکیں۔ اس کے ساتھ ہی انہوں نے کہا کہ ان طلباء میں 10 فیصد خصوصی کوٹہ بلوچستان کے طلباء کے لیے مختص کیا گیا ہے۔
وزیرِ اعظم نے چین کا شکریہ ادا کرتے ہوئے کہا کہ پاکستان کے طلباء کو زرعی تربیت فراہم کرنے کے لیے چین کی جانب سے اس موقع کی فراہمی پر شکر گزار ہیں۔
