ملتان میں موسیقی کے رنگ، استاد صغیر احمد اور دیگر مشاہیر کا ثقافت و فن پر اظہار خیال

ملتان (لیہ ٹی وی)موسیقی کے معروف استاد صغیر احمد نے کہا ہے کہ ہماری موسیقی ثقافت کے خوبصورت رنگ پیش کرتی ہے۔ یہ بات انہوں نے ملتان آرٹس کونسل کے زیر اہتمام منعقدہ میوزک نائٹ سے خطاب کرتے ہوئے کہی۔
استاد صغیر احمد نے مزید کہا کہ استاد ندیم ریاض ملک موجودہ دور میں کلاسیکل گائیکی کا ایک اہم نام ہیں۔ اس موقع پر ڈائریکٹر ملتان آرٹس کونسل سلیم قیصر نے کہا کہ شوکت علی ہمارے ملک کے لیجنڈری سنگر تھے اور ان کے بیٹے علی عمران شوکت نے اپنے والد کے فنی ورثے کو جاری رکھا ہے، جو ایک خوش آئند بات ہے۔معروف شاعر اور خطاط مختار علی نے کہا کہ موسیقی ہماری روح کو بالیدگی عطا کرتی ہے، جبکہ ڈاکٹر عبدالبصیر نے ملتان کو فن و ثقافت کا گہوارہ قرار دیتے ہوئے کہا کہ ملتان کے فنکار آج بھی اپنے فن کا جادو جگا رہے ہیں۔معروف جرنلسٹ رفیق احمد قریشی نے کہا کہ ہمارے خطے میں موسیقی کی ایک مضبوط اور طاقتور روایت ہے۔ ہماری کلاسیکل اور فوک موسیقی ہماری ثقافت کی پہچان ہیں اور ان کے رنگ لوگوں کے دلوں سے پھوٹتے ہیں۔محفل میں کلاسیکل گائیک استاد ندیم ریاض ملک نے راگ پڑدیپ اور راگ بھوپالی کی شکلیں پیش کیں، جبکہ لیجنڈری سنگر شوکت علی کے صاحبزادے علی عمران شوکت نے اپنے والد کے مشہور گیت، غزلیں، ملی نغمے اور صوفیانہ کلام پیش کر کے محفل سے خوب داد سمیٹی۔