اسلام آباد (لیہ ٹی وی) ترجمان آئی ایس پی آر نے کہا ہے کہ 9 مئی کے واقعات میں مکمل انصاف اس وقت ممکن ہوگا جب ماسٹر مائنڈز اور منصوبہ سازوں کو آئین و قانون کے مطابق سزا دی جائے گی۔ ترجمان کے مطابق ریاست پاکستان ان واقعات پر انصاف فراہم کر کے ریاست کی عملداری کو یقینی بنائے گی اور نفرت، تقسیم، اور بے بنیاد پروپیگنڈے کو دفن کرے گی۔ ترجمان نے مزید کہا کہ 9 مئی کے واقعات نفرت اور جھوٹ پر مبنی بیانیے کا نتیجہ تھے، جن کے تحت مسلح افواج کی تنصیبات پر منظم حملے کیے گئے۔ یہ واقعات پوری قوم کے لیے صدمہ کا باعث بنے ہیں۔ آئی ایس پی آر کے مطابق تمام ملوث ملزمان کے خلاف ناقابلِ تردید شواہد اکٹھے کیے گئے، اور کچھ مقدمات فیلڈ جنرل کورٹ مارشل کے لیے بھجوائے گئے، جہاں قانونی تقاضوں کے مطابق ٹرائل ہوا۔ سپریم کورٹ کے 13 دسمبر 2024ء کے فیصلے کے تحت زیر التواء مقدمات نمٹانے کا عمل شروع کیا گیا۔ فیلڈ جنرل کورٹ مارشل نے پہلے مرحلے میں 25 ملزمان کو سزائیں سنائیں۔ سزا یافتہ مجرموں کو تمام قانونی حقوق فراہم کیے گئے، اور ان کے پاس اپیل کا حق موجود ہے۔ ترجمان نے کہا کہ ریاست کسی کو بھی سیاسی دہشت گردی کے ذریعے اپنی مرضی مسلط کرنے کی اجازت نہیں دے سکتی اور 9 مئی کے یومِ سیاہ کے بعد تمام شواہد کی باریک بینی سے تفتیش کی گئی۔
