عالمی شہرت یافتہ خطاط راشد سیال کی یاد میں تعزیتی ریفرنس کا انعقاد،ملتان آرٹس کونسل میں معروف شخصیات کی شرکت، راشد سیال کی خدمات اور شخصیت کو شاندار خراج تحسین

ملتان (لیہ ٹی وی) نامور شاعر، ادیب اور مصور پروفیسر انور جمال نے کہا ہے کہ راشد سیال اپنے فن پر کامل عبور رکھنے والا ایک عظیم فنکار تھا۔ انہوں نے یہ بات ملتان آرٹس کونسل کے زیر اہتمام عالمی شہرت یافتہ خطاط اور کاتب قرآن راشد سیال کی یاد میں منعقدہ تعزیتی ریفرنس کی صدارت کرتے ہوئے کہی۔ پروفیسر انور جمال نے کہا کہ راشد سیال نے برسوں کی سخت محنت سے خطاطی کے میدان میں اپنا منفرد مقام بنایا۔ ڈائریکٹر ملتان آرٹس کونسل سلیم قیصر نے کہا کہ راشد سیال کے فن کے قدر دان پوری دنیا میں موجود ہیں۔ ان کی صاحبزادی رائمہ راشد نے کہا کہ ان کے والد ایک عظیم انسان اور سچے مسلمان تھے۔
معروف ادیب شاکر حسین شاکر نے کہا کہ راشد سیال کا باطن آئینے کی طرح صاف تھا۔ ممتاز براڈ کاسٹر بہار حسین نے راشد سیال کو مثالی والد اور شوہر قرار دیا جبکہ معروف صحافی رانا پرویز حمید نے بتایا کہ راشد سیال نے اپنے ہاتھ سے تین مرتبہ قرآن مجید لکھا، جو ان کی محنت اور لگن کا منہ بولتا ثبوت ہے۔ تقریب میں دیگر مقررین نے بھی اظہار خیال کیا، جن میں ڈاکٹر عبدالبصیر، اظہر سلیم مجوکہ، مختار علی، اور حافظ کامل حسین شامل تھے۔ حافظ قاری معظم نعیم نے تلاوت قرآن پاک کی سعادت حاصل کی، اور نعت رسول مقبول ﷺ سجاد ملک نے پیش کی۔ راشد سیال کی خدمات کو ہمیشہ یاد رکھا جائے گا، اور ان کا کام خطاطی کے میدان میں ایک مشعل راہ رہے گا۔