لاہور (لیہ ٹی وی)ٓٓ 26 نومبر کو پاکستان تحریک انصاف (پی ٹی آئی) کے احتجاج کے دوران زخمی ہونے والا پاکستان رینجرز پنجاب کا ایک اور اہلکار شہید ہوگیا۔ سیکیورٹی ذرائع کے مطابق پنجاب رینجرز کے لانس نائیک محمد تنویر، جو شرپسندوں کی پرتشدد کارروائی کے دوران شدید زخمی ہوئے تھے، کومہ کی حالت میں زیر علاج تھے اور آج زخموں کی تاب نہ لاتے ہوئے شہید ہو گئے۔ سیکیورٹی ذرائع نے مزید بتایا کہ پی ٹی آئی کے احتجاج کے دوران شرپسندوں کے حملوں میں شہید ہونے والے رینجرز اہلکاروں کی تعداد اب 4 ہو گئی ہے۔ شہید لانس نائیک محمد تنویر کی قربانی ملک و قوم کے تحفظ کے لیے ان کی بے لوث خدمات کی عکاسی کرتی ہے۔ دریں اثنا، سیکیورٹی اداروں نے حملہ آوروں کے خلاف سخت کارروائی کے عزم کا اعادہ کیا ہے اور کہا ہے کہ امن و امان کی بحالی اور قانون کی بالادستی کے لیے ہر ممکن قدم اٹھایا جائے گا۔ شہید کے اہل خانہ نے اس المناک واقعے پر دکھ کا اظہار کرتے ہوئے کہا کہ وہ ان کی قربانی پر فخر کرتے ہیں، اور یہ شہادت ملک کی سلامتی اور استحکام کے لیے دی گئی ہے۔ ملک بھر میں شہید اہلکاروں کو خراج تحسین پیش کرنے کے لیے مختلف حلقوں کی جانب سے تعزیتی پیغامات کا سلسلہ جاری ہے۔
